Forbes журнали 2021 йил учун АҚШнинг энг бой 400 кишиси рейтингини эълон қилди. 25 йил ичида биринчи марта мамлакатнинг собиқ президенти Дональд Трамп ушбу рўйхатга киритилмади.
Нашр маълумотларига кўра, 400 та энг бой америкаликларнинг умумий бойлиги 1,8 триллион долларни ташкил этади, бу 2020 йилга қараганда 500 миллиард долларга кўпдир. Рўйхатдаги АҚШнинг саккизта энг бой кишилари бойлиги 100 миллиард доллардан ошади.
Тўртинчи сафар ҳам Blue Origin аэрокосмик компанияси эгаси ва Amazon асосчиси Жефф Безос рейтингнинг биринчи поғонасини эгаллади. Унинг бойлиги 201 миллиард долларга баҳоланмоқда. Иккинчи ўринни SpaceX ва Tesla компаниялари эгаси Илон Маск эгаллади, унинг бойлиги 190,5 миллиард долларга тенг. Учинчи ўринда Facebook эгаси Марк Зукерберг турибди, унинг бойлиги 134,5 миллиард долларга баҳоланмоқда.
Тўртинчи ўринни 134 миллиард доллар билан Microsoft асосчиси Билл Гейтс эгаллади, у 30 йил ичида биринчи марта АҚШнинг энг бой кишилари иккилигидан жой олмади. Бунга Гейтснинг рафиқаси билан ажрашуви сабаби бўлди, ажрим натижасида у активларнинг бир қисмини собиқ хотинига ўтказишга мажбур бўлди. Рейтингдаги энг юқори бешликни 123 миллиард доллар билан Google асосчиларидан бири ва эгаси Ларри Пейж якунлади. Унинг Google’даги ҳамкори Москвада туғилган Сергей Брин 118,5 миллиард доллар билан олтинчи ўринни эгаллади.
Қўшма Штатлардаги энг бой одамлар ўнталигидан бирорта ҳам аёл жой олмаган. Рўйхатдаги биринчи аёл — Walmart супермаркетлар тармоғи эгаси Элис Уолтон, 67,7 миллиард доллар билан 12-ўринда турибди. Forbes таъкидлашича, умумий ҳисобда аёллар рўйхатнинг атиги 14 фоизини (56 киши) ташкил қилади, уларнинг қўлидаги бойликнинг умумий қиймати 564 миллиард доллар. Рўйхатдаги аёлларнинг кўпчилиги ўз бойликларини мерос қилиб олган, фақат 10 нафари ўзи учун даромад келтирадиган компанияларнинг асосчиси ҳисобланади.
Рейтингнинг энг кекса аъзоси — Тед Лернер (ишлаб чиқувчи, Vashington Nationals бейсбол жамоасининг собиқ менежери), у октябрь ўрталарида 96 ёшга тўлади. Яна икки миллиардер — Элис Шварц ва Дэвид Готтесман — келаси йили 96 ёшга тўлади. «Янги қўшилган 29 ёшли Сем Банкман-Фрид билан бирга рўйхатнинг 40 ёшдан кичик 14 аъзоси бор», — деб қайд этади Forbes.
АҚШ собиқ президенти Дональд Трамп чорак асрда биринчи марта Американинг энг бой 400 кишиси рўйхатига киритилмади. Бунинг учун унга 400 миллион доллар етмаган. Ҳозир унинг бойлиги тахминан 2,5 миллиард долларга баҳоланмоқда. Трамп COVID-19 пандемияси бошланганидан бери 600 миллион доллар йўқотди, чунки технологик компаниялардан фарқли ўлароқ, унинг бизнес империясининг асосини ташкил этувчи меҳмонхона бизнеси ва офис бинолари коронавирус пандемияси туфайли ўз эгаларига кам даромад келтирди.
Трамп биринчи марта 1996 йилда АҚШнинг энг бой 400 кишиси рўйхатига кирганди. Ўшанда у 368-ўринни эгаллаган. 1997 йилдан 2016 йилгача у мамлакатнинг энг бой 200 кишисидан бири бўлган. У эгаллаган энг яхши поғона 71-ўрин (2003 йилда) бўлганди.
Изоҳ (0)