Президентликнинг илк кунидаёқ Трампга қарши иккита суд даъвоси киритилди

АҚШ президенти Дональд Трампга қарши унинг қасамёд маросимидан кейинги биринчи кунда иккита суд даъвоси қўзғатилди, деб хабар бермоқда Bloomberg.

Нашрнинг хабар беришича, даъволар юқори лавозимли федерал хизматчиларни ишдан бўшатиш ва туғилиш ҳуқуқи асосида АҚШ фуқаролигини бериш чекловлари тўғрисидаги фармонларга тааллуқли.

Биринчи даъво муҳожирлар ҳуқуқларини қўллаб-қувватловчи ташкилотлар томонидан тақдим этилган. Президентнинг янги фармон бўйича, эндиликда АҚШда туғилган, ота-онаси мамлакатда вақтинча ёки ноқонуний равишда бўлган болаларга Америка фуқаролиги автоматик тарзда берилмайди. Ҳуқуқ ҳимоячилари президентнинг бу қарорини ғайриқонуний деб ҳисоблаб, фуқаролик олиш ҳуқуқини Конституция ва Конгресс белгилашини таъкидлади.

Иккинчи даъвони 37 та федерал департамент ва агентлик ходимларини ўз ичига олган Ғазначилик ходимлари миллий касаба уюшмаси (National Treasury Employees Union) тақдим этди. Даъвогарларнинг фикрича, давлат раҳбарининг ҳаракатлари қонун чиқарувчиларнинг мақсадларига зид, чунки Конгресс федерал кадрлар учун “тегишли ҳуқуқий жараёнга бўлган ҳуқуқ”ни тасдиқлаган. Таъкидланишича, фармон “апелляция ҳуқуқи берилмай ишдан бўшатилиши мумкин бўлган” ходимларнинг янги тоифасини яратади.

Жорий йилнинг 20 январь куни Натионал Security Cоунселорс юридик фирмаси тадбиркор Илон Маск раҳбарлик қилаётган Ҳукумат самарадорлиги департаменти (DOGЕ) устидан судга мурожаат қилишга қарор қилгани ҳақида хабар берилган эди. Фирманинг фикрича, департамент Федерал маслаҳат қўмиталари тўғрисидаги қонунни бузмоқда, чунки унинг бир қатор талабларини бажармаяпти. Хусусан, DOGЕ мажлислари ёпиқ тарзда ўтказилмоқда, ваҳоланки улар жамоатчилик учун очиқ бўлиши лозим.

АҚШ президенти лавозимига киришган Дональд Трамп Вашингтондаги Cаpital One стадионида тарафдорлар олдида сўзга чиқиб, дастлабки тўққизта фармонни имзолади. 

Биринчи имзоланган фармонлар Жо Байден даврида қабул қилинган 78 та қарорни бекор қилиш, шунингдек, АҚШнинг Париж битимидан чиқишни ҳам ўз ичига олади. Дональд Трампнинг дастлабки фармойишлари қаторида қуйидагилар ҳам бор:

• Федерал ҳукумат устидан “тўлиқ назорат ўрнатилгунга қадар” амалдорлар томонидан янги меъёрий ҳужжатлар қабул қилинишини вақтинчалик тўхтатиш;
• Федерал ҳукуматга сўз эркинлигини тиклаш ва цензурани бекор қилиш тўғрисидаги кўрсатма;
• Ҳарбий хизматчилар ва айрим бошқа тоифалардан ташқари давлат хизматига ишга қабул қилишни тўхтатиб туриш;
• Барча давлат хизматчиларига масофавий иш шаклидан воз кечиб, дарҳол офисларга қайтиш ҳақидаги фармойиш;
• Барча федерал идораларга яшаш қимматлашуви муаммосини ҳал этиш билан шуғулланиш тўғрисидаги кўрсатма;
• Олдинги администрациянинг сиёсий рақибларини таъқиб қилиш учун суд тизимидан фойдаланишни тақиқлаш;
• БМТга АҚШнинг Иқлим бўйича Париж битимидан чиқиши ҳақидаги мактуб.

Трамп туғилганлик ҳуқуқи асосида хорижликларга фуқаролик беришни ҳам бекор қилди. Сўнгги пайтларда фарзанд кўриш учун Америкага бориш оммалашиб кетган. Кўпинча бўлажак ота-оналар бунинг учун соҳилдаги илиқ штатларни танлайди.

Бозорда бундай саёҳатларни ташкил этишда ёрдам берадиган сайёҳлик агентликлари мавжуд. АҚШнинг айрим перинатал марказларида МДҲдан келган ота-оналарга рус тилида сўзлашувчи ходимлар хизмат кўрсатади. АҚШда туғилиш нархи кўплаб омилларга боғлиқ бўлиб, 8 мингдан 19 минг долларгача ўзгариб туради.