Беларуснинг амалдаги раҳбари Александр Лукашенко еттинчи президентлик муддатига қайта сайланди. Унга сайловчиларнинг 86,82 фоизи овоз берди. Марказий сайлов комиссияси дастлабки маълумотларни эълон қилди.
Сайловчиларнинг 3,6 фоизи барча номзодларга қарши овоз берган. Сайловдаги давомад 85,7 фоизни ташкил этган. Либерал-демократик партия етакчиси Олег Гайдукевич 2,02 фоиз овоз олган. Тадбиркор Анна Канопацкая 1,86 фоизни қўлга киритган. Коммунистик партия Марказий қўмитасининг биринчи котиби Сергей Сиранков 3,21 фоиз, Меҳнат ва адолат партияси раиси Александр Хижняк эса 1,74 фоиз овоз тўплаган.
Беларусда президентлик сайлови 26 январь куни бўлиб ўтди. Овоз беришдан кейин бўлиб ўтган матбуот анжуманида Лукашенко ҳокимиятни топшириш учун ўзига ворис қидирмаётганини айтди. У республиканинг келажакдаги раҳбарияти аллақачон мавжуд кадрлар захирасидан шакллантирилганини таъкидлади.
Беларусдаги сайловлар ғарблик кузатувчилар иштирокисиз, шунингдек, хорижда сайлов участкалари очилмаган ҳолда бўлиб ўтди. Европа иттифоқи Беларусда бўлиб ўтган президентлик сайловларини эркин ва демократик деб ҳисобламасликларини, шунинг учун Минскка қарши санкциялар жорий этишни давом эттириш ниятини билдирди.
Изоҳ (0)