Россия мудофаа вазири Сергей Шойгу бошчилигидаги делегация Шимолий Кореяга ташриф буюради, деб хабар берди “РИА Новости” вазирлик баёнотига таяниб.
“КХДР Мудофаа вазирлигининг таклифига биноан Россия делегацияси корейс халқининг 1950—1953 йиллардаги миллий озодлик урушида қозонган ғалабасининг 70 йиллигига бағишланган тантаналарда иштирок этиш учун Корея Халқ Демократик Республикасига ташриф буюради”, — дейилади вазирлик хабарида.
Ташриф 25—27 июль кунларига белгиланган.
Мудофаа вазирлиги ушбу сафар Москва ва Пхеньян ўртасидаги ҳарбий алоқаларни мустаҳкамлашга ёрдам беришини ҳамда икки давлат ўртасидаги ҳамкорликни ривожлантиришда муҳим босқичга айланишини таъкидлади.
2022 йил сентябрь ойида АҚШ разведкаси Россия Шимолий Кореядан миллионлаб артиллерия снарядлари ҳамда кичик ва ўрта масофали ракеталарни сотиб олаётгани ҳақида хабар берганди. 2023 йил баҳорида Пентагон Россия қурол-яроғ эвазига озиқ-овқат таклиф қилиш учун Пхеньян га расмий делегация жўнатишни режалаштираётганини маълум қилди. Пентагон матбуот котиби Жон Кирби Россия ва Шимолий Корея ўртасидаги ҳар қандай келишув, жумладан, қурол-яроғ битими Бирлашган Миллатлар Ташкилоти Хавфсизлик кенгаши резолюциясини бузишини айтди.
Таҳлилчилар таъкидлаганидек, Россия савдо бозорларини кенгайтиришга ҳамда янги технологиялар соҳасидаги ҳамкорликка умид қилиб, “учинчи дунё” давлатлари билан муносабатларни жонлантиришга ҳаракат қилмоқда. Январь ойида Россия Ташқи ишлар вазири Сергей Лавров Беларусь раҳбари Александр Лукашенко билан Зимбабвега ташриф буюрган эди.
Шунингдек, май ойи охирида Лавров Африканинг Кения, Бурунди, Мозамбик ва Жанубий Африка Республикаси каби давлатларида бўлиб қайтди.
ЖАРда 22—24 август кунлари BRIKS саммити ўтказилади. Унга Россия президенти Владимир Путин ҳам таклиф қилинган эди. Аммо Жанубий Африка Республикаси Путинни ҳибсга олишга ордер берган Гаагадаги Халқаро жиноий суд юрисдикциясини тан олади. Охир-оқибат саммитга Путин эмас, Лавров борадиган бўлди.
Изоҳ (0)