23 август куни авиаҳалокатда вафот этган “Вагнер” раҳбари Евгений Пригожин Россиянинг кўплаб давлат мукофотларига сазовор бўлган. Бу ҳақда BBC хабар берди.
Пригожининг исми ҳатто Россия президенти Владимир Путиннинг “Президент маъмурияти ходимларини” мукофотлаш тўғрисидаги махфий фармонида ҳам кўрсатилган. Журналистлар Пригожин очиқчасига “Россия қаҳрамони” юлдузини тақиб юрганини ва исёндан кейин қидирув пайтида уйидан ўндан ортиқ давлат мукофотлари топилганини аниқлади.
Расмий равишда Кремль “Путин ошпазини” фақат уч марта мукофотлаган: иккита орден ва медал билан.
2004 йилда Пригожин II даражали “Ватан олдидаги хизматлари учун” ордени, 2008 йилда ўша пайтдаги президент Дмитрий Медведевнинг “Дўстлик” ордени билан, 2014 йилда Қрим аннексия қилинганидан ва “Вагнер” ташкил этилгандан сўнг IV даражали “Ватанга хизматлари учун” ордени билан мукофотланган.
Барча ҳолатларда Пригожин “муваффақияти меҳнати” ва “кўп йиллик виждонли фаолияти” учун мукофотларга сазовор бўлган, аммо ютуқлари кўрсатилмаган.
Махфий фармон 2006 йил 30-октябрда имзоланган ва 1199 рақамига эга. У “Россия Президенти маъмурияти ходимларини Россиянинг давлат мукофотлари билан тақдирлаш тўғрисида” деб номланган, аммо у расман эълон қилинмаган.
Мукофотларни Concord Management and Consulting компанияси бош директори Пригожин билан бирга президент ишлари бўйича менежери Владимир Кожин ва яна 17 нафар расмий шахслар олган.
“Фармоннинг номи Пригожиннинг президент маъмуриятида қандайдир яширин мавқега эга бўлгани ёки улар алоҳида фармон ёзмаслик учун унинг номини бир вақтнинг ўзида мукофотланган ходимлар рўйхатига қўйишганини англатади” — деб тушунтирди юридик фирманинг бошқарувчи ҳамкори Сергей Марков.
Шу билан бирга, махфий фармонда кўрсатилган барча шахслар 2006 йилда Санкт-Петербургда G8 саммитига тайёргарлик кўриш ва ўтказишга қўшган “катта ҳиссаси” учун мукофот тақдим этилгани кўрсатилган.
Маълумки, Пригожин Константиновский саройи ёнидаги Lindstream дачасида кечки овқат пайтида Путин ва меҳмонлар, жумладан, АҚШ президенти Жорж Бушга шахсан хизмат қилган.
Пригожиннинг ўлими: нима маълум
23 август куни Тверь вилоятида Москвадан Санкт-Петербургга учаётган шахсий Embraer Legacy самолёти ҳалокатга учради. Самолётдаги ўн кишининг бари ҳалок бўлган. Йўловчилар қаторида “Вагнер” раҳбари Евгений Пригожин ва унинг ўринбосари Дмитрий Уткин бўлган.
Россия президенти Владимир Путин ва Чеченистон раҳбари Рамзан Қодиров унинг оиласига ҳамдардлик билдирди.
“Мен Пригожинни жуда узоқ вақтдан бери: 1990 йилларнинг бошидан бери танийман. У тақдири мураккаб, ҳаётда жиддий хатоларга йўл қўйган одам эди. Керакли натижаларга эришди. У иқтидорли инсон, иқтидорли тадбиркор эди. Нафақат мамлакатимизда балки чет элда, хусусан, Африкада ҳам фаол ишлади. У ерда нефть, газ, қимматбаҳо металлар ва тошлар билан шуғулланган”, — деган Путин.
Песков “Вагнер” раҳбарининг ўлимига Путин алоқадорлигини рад этди. Тегишли фикрни Беларусь раҳбари Александр Лукашенко ҳам илгари сурди. У Пригожин ундан хавфсизлик кафолатлари сўрамагани ва “Вагнер” Беларусда қолишини айтди.
Украина президенти Владимир Зеленский ҳам воқеага муносабат билдирди ва Украинанинг бунга алоқадорлигини рад этди. У авиаҳалокат ортида ким турганини ҳамма тушунишини айтди.
Изоҳ (0)