Россия президенти Владимир Путин Москва Украина бўйича музокараларни ҳеч қачон рад этмаганини, бироқ Киев уларга тайёрлиги ҳақида очиқ гапириши кераклигини айтди. Бу ҳақда Путин Александр Лукашенко билан учрашувда маълум қилди, деб ёзмоқда Meduza.
“Биз ҳеч қачон музокара қилишдан бош тортмаганмиз, шунинг учун агар нариги томон хоҳласа, буни қилсин. Бу ҳақда гапиришяпти. Шунинг учун буни айтаман, лекин нариги томондан ҳеч нарса эшитмаяпман”, — деди Путин.
Россия президенти АҚШ давлат котиби Энтони Блинкеннинг Владимир Путин ҳозирда “конструктив дипломатия”дан манфаатдор эмаслиги ҳақида айтган сўзларига ҳам изоҳ берди. “Танго учун икки томоннинг иштироки керак”, — деганди Блинкен эҳтимолий музокаралар ҳақида гапириб.
Бунга жавобан Путин “танго яхши, аммо Украина учун гопакни (Украина халқ рақси) унутмаслик керак”, деди.
“Акс ҳолда улар ҳар доим бировнинг мусиқаси ва бегоналарнинг куйига рақс тушиб юради. Аслида, у ёки бу тарзда ҳамма бирдек ‘Бариня’ (рус халқ мусиқаси) остида рақс тушиши керак, ёки ‘Казачок’ка. Америкаликларга келсак, улар бундай тангода рақсга тушишни билмайди. Мусиқа ажойиб, ҳаракатлар чиройли. Аммо Қўшма Штатлар ҳамма нарсани куч позициясидан ёки иқтисодий санкциялар ёки молиявий чекловлар, ҳарбий куч таҳдиди ёки ундан фойдаланиш ёрдамида ҳал қилишга уринмоқда. Улар кимгадир ўргатмоқчи, лекин ўзлари қандай қилишни билмайди ёки билишни хоҳламайди”, — деди Россия президенти.
Кремль Украина билан музокаралар ўтказиш учун имконият кўрмаётганини бир неча бор таъкидлаган. 11 сентябрь куни президент матбуот котиби Дмитрий Песков “ҳозирда музокаралар жараёнини қайта бошлаш учун ҳеч қандай шарт-шароит мавжуд эмас”, деди. У Россия томони ва Путин “бошиданоқ музокаралар учун очиқ эканини” қўшимча қилди.
Украина президенти Владимир Зеленский “Россия Украина ҳудудида қолар экан, уруш давом этишини” айтган. Унинг фикрича, музокаралар йўли билан эришилган келишув абадий бўлмайди. Шунингдек, у Путин билан гаплашишга қарор қилганлар “ўзини алдаётганини” таъкидлади.
Изоҳ (0)