АҚШ президенти Жо Байден “Вагнер” ёлланма аскарлари гуруҳи раҳбари Евгений Пригожинга овқатдан заҳарланишдан эҳтиёт бўлишни маслаҳат берди. Бу ҳақда Америка етакчиси 13 июль куни Финляндияда Шимолий Европа етакчилари билан учрашув якунлари бўйича ўтказилган матбуот анжуманида айтиб ўтди.
Шу билан бирга, у Пригожиннинг қаерда ва қандай ҳолатда эканини ҳозирча ҳеч ким аниқ билмаслигига эътибор қаратди.
“Ҳа, унинг нима қила олиши фақат Худога аён. Биз унинг қаерда ва қандай ҳолатда эканини ҳам билмаймиз, мен унинг ўрнида бўлсам, ейдиган овқатимга эҳтиёт бўлардим, тушликка таклиф қилишган нарсаларини синчиклаб ўрганардим. Қисқаси: мен билмайман, ҳеч ким билмайди”, — деди Жо Байден.
23 июнь куни “Вагнер” раҳбари Евгений Пригожин ҳарбий исён эълон қилди, бу бир кун давом этди. Исёнчилар Россия пойтахти томонга бир неча юз километр юрди, аммо 24 июнь куни кечқурун Пригожин ортга қайтишни маълум қилди.
Бу қарор Пригожин ва Беларусь президенти Александр Лукашенко ўртасидаги музокаралардан сўнг қабул қилинган, унда Пригожиндан “Беларусга кетиш” сўралган.
6 июль куни Лукашенко Пригожин Беларусь ҳудудида эмас, Санкт-Петербургда эканини айтди.
Кейинроқ маълум бўлишича, 29 июнь куни Пригожин ва “Вагнер” командирлари Кремлга чақирилган, улар билан Россия президенти Владимир Путин шахсан учрашган.
Путин журналистларга учрашув тафсилотларини айтиб берди.
Изоҳ (0)