Трамп сайловолди ташвиқоти вакилининг хабар беришича, собиқ президентнинг аҳволи “яхши” ва у маҳаллий тиббиёт муассасасига ётқизилган.
Туман прокурорининг сўзларига кўра, Трамп ўқдан жароҳатланган. CBS News’га кўра, воқеа содир бўлганидан тахминан уч соат ўтгач, собиқ президент аллақачон касалхонани тарк этган.
Воқеа натижасида ҳалок бўлганлар бор — Батлер туман прокурори митинг иштирокчиларидан бири ҳалок бўлгани, яна бир киши эса оғир аҳволда эканини айтган. Отишма Махфий хизмат томонидан бартараф этилган. Ҳозирча гумонланувчининг шахси ҳақида маълумот йўқ.
Бу ҳодиса қотилликка уриниш сифатида баҳоланмоқда, деб ёзади CNN.
Ҳуқуқ-тартибот идораларига кўра, Трампга ўқ узган шахс тадбирда эмас, балки яқин атрофдаги бинонинг томида бўлган. Бутлер туман прокурори Ричард Голдингер қуролланган шахс уй томида бўлганини ва бир неча юз ярд масофадан ўқ узганини тасдиқлаган. Отишма жойидан АР-15 ярим автоматик милтиқ топилган.
Митинг иштирокчиларидан бири у ва бошқалар отишма содир бўлишидан бир неча дақиқа олдин милтиқ билан саҳнага чиққан шахсни кўрган ва полицияни огоҳлантиришга уринган, аммо натижа бўлмаган.
Президент Жо Байден Трампнинг хавфсиз эканини ҳамда ўзини яхш ҳис қилаётганини эшитганидан хурсанд эканини айтган.
У Америкада бундай зўравонликка ўрин йўқлигини таъкидлаган. Байден кампанияси воқеа туфайли телевидение рекламасини тўхтатган. Отишмадан бир неча соат ўтиб, Оқ уй Байден Трамп билан гаплаша олганини айтган. Суҳбат тафсилотлари келтирилмаган.
Ҳар икки йирик партиянинг америкалик сиёсатчилари Трампни қўллаб-қувватловчи ва сиёсий зўравонликни қораловчи баёнотлар билан чиқмоқда. Илон Маск бўлажак сайловларда Трампни “тўлиқ” қўллаб-қувватлашини ва унинг тезроқ тузалиб кетишига умид қилишини айтган.
Трамп воқеадан икки соатдан сал кўпроқ ўтиб ижтимоий тармоқларда воқеага изоҳ берган.
Мен отишмага тезкор жавоб бергани учун Қўшма Штатлар Махфий хизмати ва барча ҳуқуқ-тартибот идораларига миннатдорчилик билдирмоқчиман. Митингда ҳалок бўлган шахснинг оила аъзоларига ҳамда оғир жароҳат олган яна бир кишининг оила аъзоларига ҳамдардлик билдираман. Бу бизнинг мамлакатимизда содир бўлиши ажабланарли. Ҳозирда аллақачон ўлган жиноятчи ҳақида ҳеч нарса маълум эмас, дейди Трамп.
АҚШнинг собиқ президенти Дональд Трамп 14 июль куни Пенсилваниянинг Батлер шаҳридаги сайловолди митинги пайтида яраланган эди. Ҳодиса акс этган видеода унинг чиқиши чоғида ўқ овозига ўхшаш товушлар эшитилган. Шундан сўнг Трамп қулоғини ушлаб ётиб олган. Қўриқчилар шу заҳоти Трампни ўраб олди. Президентликка номзод ўрнидан турганида қулоғидан қон оқаётганини кўриш мумкин. Махсус хизмат агентлари уни қуршаб олиб, кўтарилишга ёрдам берди ва саҳнадан олиб кетган.
Изоҳ (0)