Трамп ФҚБни сайловлар арафасида Байденнинг ўғли ҳақидаги маълумотларни яширганликда айблади

АҚШ Федерал қидирув бюроси (ФҚБ) 2020 йилги сайловлардан сал аввалроқ амалдаги давлат раҳбари Жо Байденнинг ўғли ҳақидаги «ноқулай» ахборотни цензура остига олган, у Хантер Байденнинг ноутбуки ҳақидаги иш билан боғлиқ бўлган. Бу ҳақда АҚШ собиқ президенти Дональд Трамп ўзининг Truth Social ижтимоий тармоғида ёзди.

«Ҳозиргина маълум бўлишича, Хантер Байденнинг иши бўйича ‘суриштирув олиб бораётган’ ФҚБ бошқармаси 2020 йилги сайловлар олдидан барча ёмон маълумотларни махфий сақлаш учун цензура хусусиятига эга кўплаб сўровларни жўнатган экан», — дея қайд этди у.

Унинг сўзларига кўра, ФҚБ Хантер Байден бадном бўлмаслиги учун тер тўккан. Трамп юзага келган вазиятни «ғазабни келтирадиган шармандалик» деб атади.

Жо Байденнинг ўғлига тегишли ноутбукдаги маълумотлар ҳақида биринчи марта The New York Times газетаси 2020 йил октябрида хабар берган эди.

Мақолада айтилишича, Хантер Байден ўз отаси, ўша пайтда АҚШ вице-президенти бўлган Жо Байденни Украинанинг Бурисма энергия компанияси топ-менежери Вадим Пожарский билан таништириб қўйган, бир йилдан кейин эса Жо Байден Украина ҳукуматига босим ўтказиб, компания фаолияти устидан олиб борилаётган текширувга аралашишни ва бош прокурорни ишдан ҳайдашни сўраган. Хантернинг ўзи Бурисма директорлар кенгаши аъзоси бўлган.

Мақола Хантернинг Вадим Пожарский билан электрон ёзишмаларига асосланган. Ўз хатларида Пожарский гўёки кичик Байденга унинг отаси билан уюштирилган учрашув учун миннатдорлик билдирган ва у ўз лавозимидан Бурисмаъга ёрдам бериш учун қандай фойдалана олиши мумкинлигини сўраган.

Газета маълумотларига кўра, бу ёзишма Делавер штатида тузатиш учун устахонага берилган компьютернинг қаттиқ дискидан олинган ва ФҚБга топширилган.

Эслатиб ўтамиз, Илон Маск Жо Байденнинг ўғли билан боғлиқ можаронинг Twitter томонидан хаспўшланиши бўйича ҳужжатларни эълон қилган эди.

Маълум бўлишича, Twitter Байденлар ва Украинанинг Бурисма энергия компанияси ўртасидаги алоқалар ҳақидаги ахборотни бекитиш учун «фавқулодда чоралар» кўрган. Хусусан, 2020 йил октябрида New York Post нашрида бу иш ҳақида ҳамда кичик Байден томонидан унутиб қолдирилган ва нозик ахборотни ўз ичига олган ноутбукдан сизиб чиққан маълумотлар ҳақида хабарлар пайдо бўлиши билан, твитларни ўчириш ҳақида сўровлар келиб тушган — бу одатий амалиёт сифатида қабул қилинган.

Шунингдек, бундай хабарлар «хавфсиз бўлмаган маълумот» деб белгиланган, тўғридан-тўғри ҳаволалар эса блокланган.

Аввалроқ АҚШ Конгресси Вакиллар палатасининг назорат қўмитаси мамлакат президенти Жо Байденнинг оиласи 50 та давлатда бизнес юритмоқчи бўлганини аниқлаган эди. Таъкидланишича, АҚШ президентининг ўғли Хантер дунё бўйлаб бизнес алоқаларини йўлга қўйган. Унга оиласининг аъзоларини киришини таъминлаш орқали миллионерга айланиши мумкин. Бошқа нарсалар қаторида, Хантер одам савдоси билан алоқадор бўлиши ва унинг компьютерида бунга оид далиллар борлиги айтилмоқда. Оқ уй мазкур маълумотлар очиқланмаслиги учун 250 минг доллардан ортиқ маблағ сарфлагани қайд этилган.