Ўзбекистон президенти ёрдамчиси Саида Мирзиёева ўз нутқида хотин-қизлар мавзусига алоҳида тўхталиб, оиладаги зўравонликка қарши қабул қилинган қонунлар муҳимлигини таъкидлади.
“Аёллар ҳуқуқлари... Илгари бу борада гапириш уят ҳисобланган. Биз маиший ва иқтисодий зўравонлик, шилқимлик ҳақида сукут сақлаганмиз. Аёллар ўзини ҳимоя қилиш имконига эга эмасди. Жамият ҳамма вазиятда уларни айблаган. “Уят!” – битта жавоб шу эди. Бугун Ўзбекистонда ҳам, Қозоғистонда ҳам маиший зўравонликка қарши қонунлар қабул қилинган ва бу бизнинг умумий ютуғимиздир!”
Саида Мирзиёева, шунингдек, Қозоғистон ва Ўзбекистоннинг ютуқлари ҳам, муаммолари ҳам умумий экани, шу боис уларни ҳал этишда биргаликдаги саъй-ҳаракатлар зарурлигини таъкидлади:
“Бироқ ҳали кўплаб муаммолар борки, уларни ёлғиз ҳал қила олмаймиз. Қуриб бораётган битта умумий денгизимиз, барчамиз учун умумий бир ҳаво, битта Сирдарё. Олдимизда минтақавий хавфсизликни кучайтириш, миллий тилларимизни ривожлантириш, миллий ўзликни асраб қолиш, ёлғон хабарлар – дезинформацияга қарши кураш каби вазифалар турибди”.
Ўзбекистон президенти ёрдамчиси шундай қўшимча қилди:
“Энг муҳим вазифамиз эса таълимни ривожлантиришдир. Ўзбекистонда 7 йил аввал ҳам, ҳар йили кузда мактаб ва институтлар ёпилар эди. Ўқитувчилар, талаба ва ўқувчилар далага, пахта теримига мажбурий жалб қилинарди. Бутун бир авлод чаласавод бўлиб қолди. Бироқ биз юз йиллик пахта қуллигига барҳам бердик! Миллионлаб ўқувчилар ўқув масканларига қайтарилди”.
Изоҳ (0)