Тошкент шаҳрида ҳаракатдаги метро вагони ичидаги икки йигит нотаниш қизга шилқимлик қилиб, ҳолатни видеога олган ва интернетга юклаганди. Шундан сўнг уларнинг шахси аниқланиб, ҳар бирига 5 суткадан маъмурий қамоқ жазоси берилган. Ҳолат ижтимоий тармоқларда кенг муҳокамаларга сабаб бўлди. Хусусан, бир қатор интернет фойдаланувчилари жамоат транспортидаги тегажоғлик ҳолатларини камайтириш мақсадида метрополитенда фақат аёлларга мўлжалланган вагонлар ажратиш таклифини берди.
“Дарё” мухбири шу муносабат билан Транспорт вазирлиги ҳамда “Тошкент метрополитени” ахборот хизматлари билан боғланиб, ушбу таклиф қанчалик ўринли экани, умуман, алоҳида вагонлар масаласи режада бор ёки йўқлиги бўйича изоҳ олди.
Транспорт вазирлиги матбуот хизмати раҳбари Наврўз Ашурматовнинг айтишича, ҳозиргача ташкилотга бу мавзуга оид ҳеч қандай мурожаат келиб тушмаган.
“Бу мазмундаги таклиф келиб тушганича йўқ. Ўзимизнинг режамиздан ҳам бу масала ўрин олмаган. Чунки ўзи ҳаракат таркибининг етишмовчилиги бор. Шу сабабдан қайсидир вагонни алоҳида қилиб қўёлмаймиз. Бизнинг мақсад — ҳаракат таркибини етарли даражада таъминлаш”, — дейди Наврўз Ашурматов.
“Тошкент метрополитени” матбуот хизмати раҳбари Тўйчи Мирзаев ҳам шу маънодаги гапни айтди. Унга кўра, асосий масала — йўловчилар оқимини тартибга солиш.
“Бизнинг қўлимиздан келадигани — вақт интервалларини қисқартириб, тирбандликни камайтириш. Буни босқичма-босқич амалга ошириб келяпмиз. Бундан ташқари, янги ҳаракат таркиблари харид қилиняпти. Бу ўз-ўзидан йўловчилар оқимини тартибга солади. Алоҳида вагон қилиш режамизда йўқ”, — деб айтиб ўтди Тўйчи Мирзаев.
Аввалроқ ижтимоий тармоқларда метронинг “Беруний” бекатидаги кассада ички ишлар ходими эркаклар ва аёллардан алоҳида бўлиб навбатда туришни сўрагани ҳақида хабарлар тарқалганди. Масъулларнинг муносабат билдиришича, фуқаролардан жинсига қараб ажралган ҳолда навбатда туриш сўралаётгани ҳақидаги хабар ҳақиқатга тўғри келмайди.
Изоҳ (1)
Vagonlarni ajratib qoyish harakat tarkibi yetishmovchiligiga qanday tasiri bor? Mantiqsiz, vagonlarni ajratish nafaqat tegajog’liklarni kamaytirish, balki metrodagi tartibno ham ancha yaxshilaydi. Metro vagonlarini teng yarmini erkaklar uchun teng yarmini ayollar uchun ishlatish maqsadga muvofiq. Bunda shunchaki vagonlarni raqamlash kerak boladi xolos, shunchaki ma’sul shaxslar buni xoxlashsa bo’ldi.