Россиялик ёзувчи Захар Прилепин собиқ СССР ҳудудларини Россия Федерацияси таркибига қўшиб олишни ва унинг аҳолисига рус тилини ўргатишни таклиф қилди. У мигрантлар муаммосини шундай йўл билан ҳал қилишга умид қилмоқда.
Ёзувчи Москвада ўзининг “қўмондонлар кенгаши” фаолияти ҳақида матбуот анжумани ўтказди. У келажак режалари ҳақида гапирди, Путиннинг бешинчи президентликка номзодини қўллаб-қувватлади ва тарафдорларининг саволларига жавоб берди. Улардан бири демографиядаги муаммолар ва мигрантлар билан можароларга бағишланди.
Прилепиннинг таъкидлашича, бу муаммоларни ҳал қилиш учун кўпроқ бола туғиш керак: “Руслар қанча кўп бўлса, кўп сонли мигрантлар бизнинг юртда ўзини нотўғри тутиши билан боғлиқ муаммолар камроқ бўлади”. Ёзувчи, шунингдек, “мигрантларни Россияда эмас, балки улар келган давлатларда, масалан, Ўзбекистонда, ўқитишни таклиф қилди.
“Мен ҳазиллашаётганим йўқ. Биз Совет Иттифоқини қайта тиклаш мавзусини кўтарамиз. Бу бизга исталган вақтда: “Бизнинг икки миллион фуқаромиз сизнинг ҳудудингизда экан, биз сизнинг ҳудудингизга даъво қиламиз. Чунки кўпчилик аллақачон шу ерда, ҳаттоки бунга овоз беришган”, деб айтишга имкон беради”, — дейди ёзувчи.
Октябрь ойида Ўзбекистон президенти маслаҳатчиси Қаҳрамон Қуронбоев Россия давлат думаси вице-спикери Владислав Даванков билан учрашувда Россиядаги мигрантлар болалари учун боғча ва мактаблар очишга ёрдам беришни сўраганди.
Россиялик депутат Михаил Делягин бу ташаббус ноқонуний деб айтганди: “Менимча, Ўзбекистон, албатта, болалар боғчалари ва мактабларни қуриши керак, лекин фақат ўз ҳудудида. Ва Россияга сиқиб чиқарган фуқароларини қайтариб ватанига олиб кетиши керак”, — деган эди Делягин.
Бунга жавобан Олий Мажлис Қонунчилик палатаси депутати Алишер Қодиров Россияда ўзбеклар ва ўзбек тилига муносабат Делягинча бўлса, Ўзбекистонда рус тилига муносабат мутаносиб бўлиши кераклигини таъкидлаганди. “Юксалиш” умуммиллий ҳаракати раиси Бобур Бекмуродов эса Россия ўзбекистонликларни текинга боқмаётганини айтиб, россиялик депутатни давлати учун муҳимроқ вазифалар билан шуғулланишга чақирганди.
Ноябрь ойида Россия Давлат думаси вице-спикери Пётр Толстой посцовет ҳудудидаги мамлакатларда рус тилини ўқитиш масаласини кўтариб, республикаларда инглиз тилини ўрганишга устунлик берилаётгани, рус тилини миллий тиллар билан сиқиб чиқаришга ҳаракат қилинаётгани ҳақида гапирганди.
“Агар рус тили давлат тили бўлмаса, кечирасиз, бу мамлакатлар фуқаролари бизнинг жамоат жойларида — ҳайдовчи, сотувчи, курер бўлиб ишламаслиги керак. Бундай чора-тадбирлар аста-секин вазиятни тўғрилайди”, — деган эди у.
Бундан ташқари, Россия муҳожирларга нисбатан пассив ҳолатда қолмаслиги учун рус тили собиқ иттифоқ республикаларининг барча ҳудудларида миллатлараро мулоқот тилига айланиши кераклигини ҳам айтганди.
“Биз ўзбек тилини билмайдиган хизматчиларни ишдан ҳайдашни таклиф қилишимиз керак(ми?) Биз бошқа йўлдан борамиз — уларга ўзбек тилини ўргатамиз. Сиз эса ўзингиз ишлашни ўрганинг. Бу рус тилига қачонлардир ҳақиқий ҳурмат пайдо бўлишига олиб келиши мумкин”, — деган эди Алишер Қодиров бунга жавобан.
Изоҳ (0)