Россия Афғонистондаги муваққат ҳукумат – “Толибон”га ҳукмрон тузилмаларга бошқа сиёсий кучларни ҳам таклиф қилишни тавсия қилмоқда. Бу ҳақда Россия Ташқи ишлар вазири Сергей Лавров Россия дипломатиясининг 2023 йилдаги якунларига бағишланган матбуот анжуманида маълум қилди.
Вазирнинг сўзларига кўра, Россиянинг Кобулдаги элчихонаси “Толибон” билан алоқаларни тўхтатмаяпти, жумладан, улар тўлиқ тан олинган ҳукуматга айланиши учун ҳал қилиниши керак бўлган масалалар бўйича ҳам доимий алоқада.
“Бу, биринчи навбатда, ўз ваъдаларининг бажарилиши, улардан асосийси – инклюзив ҳукуматни яратиш. Унда нафақат этник пуштунлар, балки бошқа барча этник гуруҳлар вакиллари ҳам бўлади. Балки сиёсий инклюзивлик ҳам бўлар. (Ҳозир ҳам) пуштунлар, ўзбеклар, тожиклар, ҳазоралар бор, лекин сиёсий жиҳатдан улар толиблар ҳисобланади. Биз “Толибон”га бошқа сиёсий кучларни ҳам ҳукмрон тузилмага таклиф қилишни фаол тавсия қиламиз”, — деди Лавров.
Ҳозирча ҳеч бир ҳукумат ёки давлат “Толибон” муваққат ҳукуматини тан олмаган. Халқаро ҳамжамият “Толибон”дан инсон ҳуқуқларига мос ижобий қадамлар кутмоқда. Аввалроқ “Толибон” ҳаракати БМТга ташкилотдаги афғон вакилининг ўрнини беришни сўраб мурожаат қилганди.
Шу кунгача БМТда Афғонистоннинг икки йилдан кўпроқ вақт олдин ағдарилган ҳукумати томонидан тайинланган дипломатлар штаби вакиллик қилиб келади.
Изоҳ (0)