АҚШ президенти Дональд Трамп Американинг собиқ раҳбари Барак Обамани давлатга хиёнатда айблади. У Обаманинг айбини исботлаш учун ҳужжатли далиллар борлигини, шунингдек, мамлакатнинг бошқа собиқ раҳбари Жо Байден ва 2016 йилги сайловларда мағлуб бўлган Ҳиллари Клинтон ҳам “тўда аъзолари” бўлганини таъкидлаган. Бу ҳақда Оқ уй раҳбари филиппинлик ҳамкасби кичик Фердинанд Маркос билан олиб борган музокаралар чоғида маълум қилган.
“Обама — тўда етакчиси, Барак Ҳусайн Обама қўлга тушди, унинг имзолари ҳужжатларда бор. Байден ҳам шу ерда эди. Яна минглаб ҳужжатлар келиб тушади. Бу ғоя Обаманики эди, лекин у сохта Ҳилларидан ҳам келиб чиққан. Биз уларни фош қилдик!”, деди Трамп Оқ уйда журналистларга.
Трампнинг таъкидлашича, уни таъқиб қилганлар учун “жавобгарлик вақти етиб келди”.
Унинг сўзларига кўра, 2016 йилдаги президентлик сайловларида мағлубиятга учраган Клинтон учун “Россия изи” ҳақидаги назария рад этилганидан сўнг оқибатлар юзага келиши мумкин эди.
“Биз Ҳиллари Клинтонни фош қилганимизда, мен “Келинг, ҳаддан ошиб кетмайлик, у собиқ президентнинг рафиқаси-ку”, дедим. Мен уни жазосиз қолдирдим”, деди Оқ уйнинг амалдаги раҳбари.
“Улар менга нисбатан қилган ишларидан кейин, бу тўғрими ёки йўқми, барибир одамларни таъқиб қилишни бошлаш вақти келди”, деди АҚШ президенти.
“Обама айбдор, бу хиёнат эди. Улар сайловларни ўғирлашга уринишди, ҳатто нотинч мамлакатлар учун ҳам тасаввур қилиб бўлмайдиган ишларни қилишди. Бунинг оқибатлари жиддий бўлиши керак”, дея қўшимча қилган у.
Бундан аввал АҚШнинг собиқ президенти Барак Обама Конгрессга 2016 йилги Америка сайловларига Россиянинг аралашуви мавзусини бўрттириб кўрсатиш бўйича тил бириктириш юзасидан кўрсатма бериш учун чақирилиши мумкинлиги ма`лум қилинганди.
Бунда аввал Трамп Обаманинг тез орада қамоққа олинишига ишора қилиб, собиқ президент ФҚБ ходимлари томонидан ҳибсга олинаётгани тасвирланган сунъий яратилган видеони эълон қилганди.
Изоҳ (0)