Москвада “Ватандош” ўзбеклар жамияти раҳбари Усмон Баратовга нисбатан жиноий иш қўзғатилди. Бу ҳақда Тергов қўмитаси хабар берди.
Тергов қўмитасига кўра, декабрь ойида Баратов ва бошқа шахслар Москва вилоятида бўлганларида ижтимоий тармоқдаги шахсий саҳифаларида “бир гуруҳ руслар, жумладан, ъмахсус ҳарбий операция иштирокчилариънинг қадр-қимматини камситувчи” постни эълон қилган.
Баратовга нисбатан Жиноят кодексининг 282-моддаси 2-қисми “в” банди (уюшган гуруҳ томонидан нафрат ёки адоват қўзғатишга, шунингдек, шахс ёки гуруҳ қадр-қимматини камситишга қаратилган ҳаракатлар) билан жиноий иш очилган.
Тегишли иш доирасида Баратов 600 минг рублгача жарима, 3 йилгача муайян лавозимларни эгаллаш ёки муайян фаолият билан шуғулланиш ҳуқуқидан маҳрум қилинган ҳолда 5 йилгача мажбурий меҳнат ёки 3 йилдан 6 йилгача озодликдан маҳрум қилиниши мумкин.
Ўзбек жамияти раҳбари пойтахт Тергов қўмитаси бўлимига олиб кетилган. Бошқа алоқадорлар ҳам аниқланмоқда, дейди Тергов қўмитаси.
Баратовга нисбатан иш очишни Тергов қўмитаси раҳбари Александр Бастрикин буюрган. “Россия ҳарбий мухбирлари” унга ўзбек жамияти раҳбарининг “таҳқирловчи баёнотлари”га жавоб беришни сўраб мурожаат қилишган, дейилади идора хабарида.
Иш қўзғатилишига Баратовнинг ижтимоий тармоқларда тухум нархи ҳақидаги пости сабаб бўлган. Тегишли постда товуқнинг сурати акс этган, унда шундай ёзув бор “Сизга тухум эмас, ёғлиққина бир бало бўлсин! Хўрозларни фронтдан қайтаринг!”.
Баратовнинг ўзи бир ой давомида унинг ёрдамчиси “товуқларнинг сатирик фотосуратини” олиб ташламаганидан афсусда эканини айтган. У тегишли пост “махсус ҳарбий операция иштирокчиларини” ҳақорат қилишни билдирмаслигини таъкидлаган.
Унинг маълум қилишича, товуқлар ва хўрозлар “фойдали ва жуда яхши паррандалар бўлиб, уларнинг махсус ҳарбий операцияга ҳеч қандай алоқаси йўқ” ва фронтлар “ҳар хил бўлиши мумкин, масалан, меҳнат”. Маълумот ўрнида, Усмон Баратовнинг асл миллати ўзбек ва Россия фуқароси ҳисобланади.
Изоҳ (0)