Эркинжон Турдимов 5 ноябрь куни Самарқанд вилояти ҳокими лавозимига тасдиқланди. Бу ҳақда вилоят ҳокимлиги матбуот хизмати хабар берди.
Қонунчиликка кўра вилоят ҳокими лавозимига номзод президент томонидан тақдим этилади ҳамда ушбу номзод бўйича партия гуруҳлари билан маслаҳатлашув ўтказилади. Хабарда айтилишича, шу муносабат билан вилоят ҳокими лавозимига номзод бўйича партия гуруҳлари билан маслаҳатлашув ўтказиш учун президент маслаҳатчиси Г.Мирзаев сессия ишида иштирок этди. Маслаҳатлашувда президент томонидан Самарқанд вилояти ҳокими лавозимига Эркинжон Турдимов номзоди кўрсатилгани билдирилди.
Номзод депутатларга ҳудудни ижтимоий-иқтисодий ривожлантиришнинг истиқболига мўлжалланган ўз дастурини тақдим этди. Номзод бўйича партиялар гуруҳлари ҳам ўз фикр-мулоҳазаларини билдирди.
Конституциянинг 122-моддаси ҳамда “Маҳаллий давлат ҳокимияти тўғрисида”ги қонуннинг 2-моддасига мувофиқ халқ депутатлари Самарқанд вилояти кенгашининг еттинчи чақириқ биринчи сессияси қарори билан Эркинжон Турдимов номзоди Самарқанд вилояти ҳокими лавозимига тасдиқланди.
Эркинжон Турдимов 2018 йилнинг июлида Самарқанд вилояти ҳокими этиб тайинланганди. Ундан аввал Сурхондарё вилояти ҳокими лавозимида ишлаб келган.
Изоҳ (1)
Eng zo'r hokim nominatsiyasi bo'lsa har yili shu odam olardi