Самарқанд вилояти ҳокими Эркинжон Турдимов соғлиғи сабаб лавозимини тарк этиши мумкин. Бу ҳақда Telegram’даги “Генералиссимус” канали маълум қилди.
Канал муаллифининг билдиришича, Турдимов ўрнига Ҳисоб палата раиси Адиз Бобоев тайинланиши кутилмоқда.
“Дарё”нинг ҳукуматдаги манбаси ҳам мазкур хабарни тасдиқлади. Таҳририят журналисти қўшимча маълумот олиш учун Самарқанд вилояти ҳокимлиги ахборот хизмати билан боғланди.
Турдимовнинг матбуот котиби Манучеҳр Мирзаевнинг маълумот беришича, бугун вилоят ҳокимлигида одатий, навбатдаги сессия бор.
Лекин Telegram’да тарқалаётган хабар бўйича билмадим. Ҳозирча бу ҳақда гап йўқ, деди Манучеҳр Мирзаев.
Эркинжон Турдимов 2018 йилда Самарқанд вилояти ҳокими этиб тайинланиб, Туробжон Жўраев ўрнини эгаллаганди.
У 2024 йил 5 ноябрь куни Самарқанд вилояти ҳокими лавозимига қайта тасдиқланганди.
Эркинжон Турдимов 55 ёшда. У 1969 йилда Самарқанд вилоятида туғилган. 1991—1995 йилларда “Ўзсаноатқурилишбанк” ҳудудий бўлимларига раҳбарлик қилган, 1996 йилгача Зарафшон ҳокими ўринбосари лавозимида фаолият кўрсатган. 1996 йилдан 2000 йилгача Ташқи иқтисодий фаолият Миллий банкининг Навоий бўлимида бошқарувчиси сифатида ишлаган. 2000 йилдан 2008 йилгача Хатирчи тумани ҳокими бўлган. 2008—2016 йилларда Навоий вилояти ҳокими лавозимида ишлаган.
2016 йил декабридан Самарқанд вилоятига ҳоким бўлгунча Сурхондарё вилоятини бошқариб келган.
Турдимов 2006 йилда “Меҳнат шуҳрати” ордени билан, 2024 йил 24 августда Фидокорона хизматлари учун ордени билан мукофотланган.
Изоҳ (0)