Самарқандда Coca-Cola ичимлигининг навбатдаги заводи очилди

2024 йил 15 май куни Самарқанд вилояти Жомбой туманида Coca-Cola ичимлиги заводининг тантанали очилиш маросими бўлиб ўтди.

Тадбирда компания раҳбарлари, вазирлик ва идоралар вакиллари, тадбиркорлар иштирок этди.

Маросимда Anadolu гроуп бош директори Бурак Башарир нутқ сўзлаб, янги заводнинг ишга турилиши муҳим воқеалардан эканини айтди.  

“Ўзбекистонда Coca-Colaнинг тўртинчи заводини очаётганимиз мамлакат ҳалқи, ҳукумати ва бизнес муҳитига бўлган кучли ишончимиз ифодасидир. Ҳозиргача республикада ичимлик ишлаб чиқариш учун 500 миллион доллардан зиёд сармоя киритдик. Шундан 112 миллион доллари Самарқандда очилган янги заводимизга қилинган сармоядир. Бу корхонада 300 та иш ўрни яратяпмиз. Ичимлик ишлаб чиқаришда 80 фоиз маҳсулот маҳаллий бозордан харид қилинади”, — деди Бурак Башарир.

Тантанада меҳмонларга янги завод ҳақида маълумот берилди. Айтилишича, корхонанинг умумий ҳудуди 18,5 гектарни ташкил қилади. Йилига 280 миллион литр ичимлик ишлаб чиқарилади.

Тадбирда Самарқанд вилояти ҳокими Эркинжон Турдимов янги завод очилиши билан барчани қутлади.

“Бугун Жомбой туманида тарихий кун, катта тантана. Бу ерда дунё тан олган бренд Coca-Cola ичимлигининг янги ишлаб чиқариш корхонаси ўз фаолияти бошламоқда. Тан олиб айтиш керакки, ҳозирда ўзбекистонликларнинг Coca-Cola ичимлигига бўлган талаби жуда юқори”, — деди вилоят раҳбари.

Шу билан бирга, Инвестициялар, саноат ва савдо вазири Лазиз Қудратов ҳам барчани табриклаб, ҳукумат инвесторларга шароит яратишга доим тайёрлигини айтди.

“Ўзбекистонда хусусий секторда инвесторларга катта имкониятлар берилмоқда. Бугунги воқеа ҳам сўзимнинг исботидир. Ҳукумат инвесторлар билан яқин ҳамкор бўлишга доим интилиб келган. Мамлакатда бизнесни ривожлантириш жуда ҳам зарур. Бу янги иш ўринлари, даромадлар ва аҳоли фаровонлигини оширишда муҳим аҳамиятга эга. Биз инвесторларга қулай шароитлар яратишда давом этамиз”, — деди вазир.

Anadolu гроуп 20 та давлатда фаолият юритаётган 80 та компанияга эгалик қилади. Хусусан, Coca-Cola cомпанй бренди билан ҳамкорликда қатор мамлакатларда заводлар фаолиятини олиб боради.

Тошкент, Наманган, Урганч шаҳарларидаги Coca-Cola ичимлиги заводлари ҳам шулар жумласидан. 

Самарқанддаги тантанали очилиш маросимидан сўнг меҳмонлар янги завод ускуналари билан таништирилди.

Реклама ҳуқуқи асосида.