Prezident farmoni bilan Erkinjon Turdimov Sirdaryo viloyati hokimi vazifasini bajaruvchi etib tayinlangandi. U tayinlov o‘qib eshittirilgan Xalq deputatlari Sirdaryo viloyati kengashining navbatdan tashqari sessiyasida chiqish qilib, Sirdaryoni rivojlantirish haqida gapirdi.
“Sirdaryoning odamlarini rozi qilish, ijtimoiy obyektlarni rivojlantirish, eng asosiysi kambag‘allikdan chiqarish bo‘yicha o‘zimning bilimimni, tajribamni, kerak bo‘lsa borlig‘imni sarflab, mana shu ishga yondashaman”, dedi Erkinjon Turdimov.
“Sirdaryo” telekanali efirida ma’lum qilinishicha, sessiyani Xalq deputatlari viloyat kengashi raisi Pokiza Ahmedjonova olib bordi. Unda bosh vazir Abdulla Aripov ham ishtirok etdi. Tanqidiy ruhda bo‘lib o‘tgan sessiyada O‘zbekistonda olib borilayotgan islohotlar, viloyatni iqtisodiy-ijtimoiy rivojlantirishga imkoniyatlar yaratilganiga qaramasdan, hududda so‘nggi ikki yil ichida yo‘l qo‘yilgan kamchiliklar muhokama qilindi.
-hmpAM-79.jpg)
-ytB6g0g_.jpg)
Shundan so‘ng yig‘ilishda hukumat a’zolari, mahalliy ijro hokimiyati vakillari hamda deputatlar bilan hamkorlikda viloyatda qishloq xo‘jaligi iqtisodiyotini rivojlantirish, investitsiya va tadbirkorlik muhitini yaxshilash, aholining ijtimoiy sharoitlarini oshirish va boshqa yo‘nalishlarda qo‘shimcha vazifalar belgilandi.
2018-yil iyuldan buyon Samarqand viloyati hokimi lavozimida ishlab kelgan Erkinjon Turdimov boshqa ishga o‘tishi munosabati bilan 2024-yilning noyabrida Samarqand viloyati hokimi lavozimidan ozod etilgandi. Sirdaryo viloyatining avvalgi hokimi Akmaljon Mahmudaliyev 2025-yil 16-yanvar kuni prezident raisligida bo‘lib o‘tgan yig‘ilishda lavozimidan ozod etilgandi. Bunga hududida investitsiyalarni jalb qilish, qishloq xo‘jaligini rivojlantirish va boshqa yo‘nalishlardagi faoliyatda jiddiy kamchiliklarga yo‘l qo‘ygani sabab bo‘ldi.
Izoh (0)