Тожикистон инсон ҳуқуқлари вакили Умед Бобозода россиялик ҳамкасби Татьяна Москалковага мигрантларнинг ҳуқуқ ва эркинликлари бузилиши юзасидан мурожаат қилди. Унинг баёноти матни матбуот хизмати томонидан эълон қилинди.
Бобозода меҳнат муҳожирларининг ҳужжатлари қонунийлиги текширилаётгани ҳақида хабар топишганини маълум қилди. Тармоқларда тарқалган видеоларга кўра, ҳуқуқни муҳофаза қилиш идоралари ходимлари “қўполлик, калтаклаш ва ҳақоратлаш каби тақиқланган муомала усулларини қўлламоқда”.
Тожикистон фуқаролари кўпинча чегарада узоқ вақт, баъзан бир неча кун давомида тегишли яшаш шароитлари ва овқатланиш таъминланмаган ҳолда ушлаб турилмоқда. Улар орасида амалдорлар вакиллари, талабалар, кексалар, аёллар ва болалар ҳам бор, деб таъкидланади омбудсман мурожаатида.
У Москалковадан республика фуқароларининг Россиядаги ҳуқуқларига риоя қилинишини ва мигрантларга нисбатан нотўғри муносабат ҳолатлари текширилишини талаб қилди.
Бир ҳафта олдин Тожикистон бош вазири Қоҳир Расулзода Россияда ўз фуқароларининг ҳуқуқ ва эркинликлари бузилаётганини маълум қилганди. У тобора кўпроқ фуқаролар Россияга киришда қийинчиликларга дуч келаётганини айтган. Уларга хавфсизликни таъминлаш билан боғлиқ ноаниқ ва мавҳум баҳоналар билан кириш рад этилмоқда ёки мамлакатдан чиқариб юборилмоқда.
Изоҳ (0)