Тожикистонлик мигрантлар Сўғд вилояти Басманда қишлоғидаги йўлларни таъмирлаш учун 188 минг доллар йиғди. Бу ҳақда Кnews хабар берди.
Басманда қишлоғи Деваштич туманидаги энг йирик қишлоқлардан бири. У ерда 10 мингдан ортиқ аҳоли яшайди, аммо аҳолининг деярли ярми ишлаш учун чет элга ёки пойтахтга кетган. Узунлиги беш километр бўлган қишлоқнинг асосий кўчаси совет давридан буён таъмирланмаган. Бироқ вазият яқиндан ўзгарди ва бунга мигрантлар сабаб бўлди.
Қишлоқдан кетган меҳнат муҳожирлари жами 188 минг доллар ёки 2 миллион сомоний йиғди. Бу пулларга ярим аср ичида биринчи марта қишлоқдаги асосий йўлга асфалт ётқизилди.
“Бутун йўл ўйдим-чуқур эди. Одамлар қоқилишарди. Оддий юриш ҳам имконсиз эди, машина бутунлигича титрарди”, дейди Басманд қишлоғида яшовчи Махмадназар Ҳақназаров.
“Йўлни таъмирлаш ташаббуси учта маҳаллий тадбиркор томонидан илгари сурилган. Уларни қишлоқдаги 4 мингга яқин меҳнат муҳожири қўллаб-қувватлади. ‘Мигрантлар’ деганда мен ҳозир Душанбе ва Хўжандда ишлаётганларни ҳам назарда тутяпман. Йўл қурувчиларга қишлоқ аҳолисининг ўзи ёрдам беради”, дейди туманда яшовчи яна бир фуқаро Раҳматулло Ёров.
“Қариндошларимдан тахминан 20-25 киши меҳнат миграциясида. Уларнинг ҳаммаси уч мингдан беш минг сомонигача пул ажратди”, дейди Абдумажид Олимов.
Қишлоқ аҳолисига кўра, бу улар томонидан қўллаб-қувватланаётган ва амалга оширилаётган биринчи лойиҳа эмас. “Басмандада бадавлат аҳоли, масалан, Маккага ҳаж зиёрати ёки дабдабали тантаналар ўрнига дастлаб умумий муаммоларни ҳал қилишга маблағ сарфлаш анъанага айланган”, дейилади хабарда.
Изоҳ (0)