Япониялик олимлар 65 ёшдан ошган 8766 кишидан олинган маълумотларни таҳлил қилди. Улар кўк чойни мунтазам истеъмол қилиш ва ёши улуғ одам бош миясининг оқ моддасида ўзгаришлар ўртасида боғлиқликни ўрганди.
Тадқиқотлар натижасига кўра ушбу ичимлик когнитив функцияларни сақлашга ёрдам бериши мумкин. Олимлар кўк чой истеъмоли ва бош мия ҳолати ўртасидаги боғлиқликни ўрганиш учун МРТ маълумотларидан фойдаланган.
Кўк чой таркибидаги антиоксидантлар ва яллиғланишга қарши моддаларнинг мия оқ моддасини ҳимоя қилиши ва унинг шикастланишини камайтириши аниқланган. Бу мия саломатлигини узоқроқ сақлашга ёрдам бериши мумкин. Хусусан, ҳар куни уч пиёла кўк чой (600 мл) ичган одамларда бир пиёла (200 мл) ичганларга қараганда оқ модданинг зарарланиши 3 фоизга камроқ бўлган. Кунига 7–8 пиёла чой ичганларда эса бир пиёла истеъмол қилганларга нисбатан бу кўрсаткич 6 фоизга паст бўлган.
Тадқиқотчилар кўк чой таркибидаги катехинларнинг, хусусан, эпигаллокатехин галлат каби антиоксидант ва яллиғланишга қарши хусусиятлари томирларнинг зарарланишини камайтириб, мия саломатлигига фойда келтириши мумкинлигини тахмин қилишмоқда. Бироқ айнан ушбу компонентларнинг бунга сабаб бўлиши ва чойга алоқаси ҳали тасдиқланмаган.
Чойдан ташқари, олимлар қаҳванинг таъсирини ҳам ўрганишди, аммо у бош миядаги кўрсаткичларга сезиларли таъсир кўрсатмаган.
Мазкур маълумотлар 2016–2018 йилларда йиғилган. Унда тадқиқот иштирокчиларининг парҳези, когнитив хусусиятлари ва МРТ натижалари ўрганилган. Кўк чой ва кофени кундалик истеъмол қилиш миқдорини аниқлаш учун иштирокчилар тўртта гуруҳга бўлинган:
- 0–200 мл
- 201–400 мл
- 401–600 мл
- ≥601 мл чой ичган одамлар.
Юқоридаги тадқиқотдан хулоса қилиш мумкинки, кўк чой таркибидаги антиоксидантлар ва яллиғланишга қарши моддалар бош мия оқ моддасини ҳимоя қилади ва унинг шикастланишдан асрайди.
Изоҳ (0)