Yaponiyalik olimlar 65 yoshdan oshgan 8766 kishidan olingan ma’lumotlarni tahlil qildi. Ular ko‘k choyni muntazam iste’mol qilish va yoshi ulug‘ odam bosh miyasining oq moddasida o‘zgarishlar o‘rtasida bog‘liqlikni o‘rgandi.
Tadqiqotlar natijasiga ko‘ra ushbu ichimlik kognitiv funksiyalarni saqlashga yordam berishi mumkin. Olimlar ko‘k choy iste’moli va bosh miya holati o‘rtasidagi bog‘liqlikni o‘rganish uchun MRT ma’lumotlaridan foydalangan.
Ko‘k choy tarkibidagi antioksidantlar va yallig‘lanishga qarshi moddalarning miya oq moddasini himoya qilishi va uning shikastlanishini kamaytirishi aniqlangan. Bu miya salomatligini uzoqroq saqlashga yordam berishi mumkin. Xususan, har kuni uch piyola ko‘k choy (600 ml) ichgan odamlarda bir piyola (200 ml) ichganlarga qaraganda oq moddaning zararlanishi 3 foizga kamroq bo‘lgan. Kuniga 7–8 piyola choy ichganlarda esa bir piyola iste’mol qilganlarga nisbatan bu ko‘rsatkich 6 foizga past bo‘lgan.
Tadqiqotchilar ko‘k choy tarkibidagi katexinlarning, xususan, epigallokatexin gallat kabi antioksidant va yallig‘lanishga qarshi xususiyatlari tomirlarning zararlanishini kamaytirib, miya salomatligiga foyda keltirishi mumkinligini taxmin qilishmoqda. Biroq aynan ushbu komponentlarning bunga sabab bo‘lishi va choyga aloqasi hali tasdiqlanmagan.
Choydan tashqari, olimlar qahvaning ta’sirini ham o‘rganishdi, ammo u bosh miyadagi ko‘rsatkichlarga sezilarli ta’sir ko‘rsatmagan.
Mazkur ma’lumotlar 2016–2018 yillarda yig‘ilgan. Unda tadqiqot ishtirokchilarining parhezi, kognitiv xususiyatlari va MRT natijalari o‘rganilgan. Ko‘k choy va kofeni kundalik iste’mol qilish miqdorini aniqlash uchun ishtirokchilar to‘rtta guruhga bo‘lingan:
- 0–200 ml
- 201–400 ml
- 401–600 ml
- ≥601 ml choy ichgan odamlar.
Yuqoridagi tadqiqotdan xulosa qilish mumkinki, ko‘k choy tarkibidagi antioksidantlar va yallig‘lanishga qarshi moddalar bosh miya oq moddasini himoya qiladi va uning shikastlanishdan asraydi.
Izoh (0)