АҚШнинг сайланган президенти Дональд Трампнинг ўғли АҚШ Гренландияни сотиб олишини қўллаб-қувватлаш учун уйсизларга пул берди. Бу ҳақда Bild хабар берди.
Ҳафта бошида кичик Дональд Трамп Гренландия пойтахти Нуукка ташриф буюрган. У ўзини содиқ тарафдорлари қуршовида кўрсатишга уринган. Make America Great Again ёзуви туширилган кепка кийган маҳаллий аҳоли бўлажак Америка президентини яхши кўришларини айтган.
Аммо Bild хабарига кўра, бу “мухлислар” аслида Дональд Трампнинг ҳақиқий тарафдорлари эмас. Одамларни бепул овқат эвазига кўчадан чақиришган.
Кичик Трамп супермаркет олдида майда-чуйда сотиб кун кўрадиган уйсизлар ва камбағалларни топган, деди учрашув иштирокчиларидан бири.
Таклиф этилганларга Трампнинг сайловолди кампанияси белгиси туширилган кепкалар берилган ва улар ресторанга таклиф қилинган. Бутун тадбирга АҚШнинг сайланган президенти ўғли 10 минг Дания кронидан кам (тахминан 1340 евро) сарфлагани айтилмоқда.
Ресторан ходимига кўра, ташкилотчилар “деразадан кўчага қараб бепул овқат борлигини бақириб айтган ва бу жуда уятли бўлган”. Гувоҳлар официантларга деярли чой пули қолдирилмаганини айтмоқда.
Трамп 10 январь куни Гренландия аҳолиси Трампдан оролни сотиб олишни сўраган видеони эълон қилганди. Видео кичик Трампнинг яқинда оролга ташрифи чоғида суратга олинган. Кадрларда Make America Great Again ёзуви туширилган кепкали аҳоли АҚШнинг сайланган президентини қўллаб-қувватлашини айтганди.
Трамп Гренландияни ўзлаштирмоқчи
Трамп бир неча бор Гренландия АҚШ таркибига кириши кераклигини айтди. Унинг сўзларига кўра, орол миллий хавфсизлик ва ҳимоя учун, жумладан, Хитой ва Россиядан ҳимояланишда стратегик аҳамиятга эга.
Гренландия бош вазири Муке Эгеде орол “ҳеч қачон сотилмайди” деб жавоб берди. Шу билан бирга, у орол Даниядан мустақилликка эришмоқчи эканини тан олди. Гренландия 1953 йилгача Дания мустамлакаси бўлган ва ҳозиргача қиролликнинг бир қисми бўлиб қолмоқда. 2009 йилда орол ўзини ўзи бошқариш ва ички сиёсатда мустақил танлов қилиш имконияти билан автономияга эга бўлди.
Bloomberg манбаларига кўра, Трамп жамоаси Гренландия билан қизиқишган, чунки оролда электрон қурилмаларда ишлатиладиган олтин, олмос, уран ва нодир металларнинг катта захиралари мавжуд. АҚШнинг Гренландия минерал-хом ашё секторига киритган сармояси дунёнинг нодир металлар бозорида Хитойнинг ҳукмронлигига қарши курашда ҳал қилувчи рол ўйнаши мумкин.
Трампнинг таҳдидлари фонида Дания Гренландия мудофаасини кучайтириб, гербини ўзгартирди. Қирол Фредерик Х Норвегия ва Швеция билан иттифоққа ишора қилган ва 500 йилдан ортиқ вақт давомида гербда бўлган учта тожни олиб ташлашни буюрди. Гренландия ва Фарер ороллари рамзлари — оқ айиқ ва қўчқор икки қисмга бўлиниб, иккинчи ва учинчи майдонларга кўчирилди, яъни катталаштирилди. Дания ва Жанубий Ютландия рамзлари эса биринчи ва тўртинчи майдонларга ўтказилди.
CNN маълумотларига кўра, президент маслаҳатчилари Дания амалдорларини АҚШнинг сайланган президенти Гренландияга нисбатан жиддий ниятда экани ҳақида огоҳлантирган.
Изоҳ (0)