Истанбул шаҳридаги Бош консулхонага Туркияда спиртли ичимликдан вафот этган ўзбекистонликлар 10 нафарга етганини маълум қилди.
14 январь куни 6 нафар фуқаро вафот этгани ҳақида хабар берган эди. 15 январь куни Бош консулхонага 4 нафар фуқаронинг (барчаси эркак киши) сохта спиртли ичимлик истеъмол қилиш натижасида вафот этгани бўйича мурожаатлар келиб тушган. 16 январь куни яна бир Ўзбекистон фуқароси сохта спиртли ичимлик истеъмол қилиш оқибатида вафот этганини тасдиқланди. Кейинроқ сўнгги қурбон ҳақидаги хабар ўчириб ташланди.
Бош консулхонанинг билдиришича, фуқаролар вафоти бўйича тақдим этилган маълумотлар юзасидан аниқлик киритиш ишлари давом эттирилмоқда.
Бош консулхона дипломатлари ушбу ҳолат юзасидан Истанбул соғлиқни сақлаш, суд-тиббий экспертиза бошқармаси ҳамда ҳуқуқни муҳофаза қилиш органлари билан доимий алоқада бўлиб турибди.
Бош консулхона барча фуқароларни спиртли ичимликлардан тийилишга ва эҳтиёткорликка чақирди.
Аввалроқ Самарқандда ароқдан заҳарланиш оқибатида 5 нафар эркак вафот этгани ҳақида хабар берилганди. Қўлбола усулда тайёрланган спиртли ичимлик маҳсулотларини сотган шахсга нисбатан жиноят иши қўзғатилди. Қорақалпоғистоннинг Беруний ҳамда Тошкент вилоятининг Оққўрғон ва Янгийўл туманларида қўлбола алкоголь маҳсулотларини муомалага киритилишининг олди олинди.
Андижон вилоятида 2024 йил декабрида 5 киши спиртли ичимликдан заҳарланиб вафот этганди. 22 киши Ўзбекистон акциз маркаси ёпиштирилган “Ўзбекистон” номли коняк истеъмол қилгани оқибатида шифохонага ўткир заҳарланиш ташхиси билан ётқизилган. Шифокорлар томонидан кўрсатилган зарур тиббий ёрдамга қарамасдан, уларнинг 5 нафари вафот этганди.
2023 йилнинг сентябрида Фарғона вилояти Қўштепа ва Олтиариқ туманларида 7 киши ароқдан заҳарланганди. Наманганда эса 2020 йил охирларида 12 киши ароқдан заҳарланиб, уларнинг икки нафари вафот этганди.
Изоҳ (0)