Туркиянинг Истанбул шаҳрида қалбаки алкоголдан заҳарланиб вафот этган ўзбекистонликлар 6 нафарга етди. Бу ҳақда Бош консулхона матбуот хизмати хабар берди.
2025 йил 14 январь куни Истанбулнинг Аксарай туманида сотиб олинган қўлбола спиртли ичимлик истеъмоли оқибатида 35–40 ёшдаги 5 нафар ўзбекистонлик эркак вафот этганди. Олинган маълумотларига кўра, сўнгги сутка ичида Истанбул шаҳрида жами 38 киши сохта спиртли ичимлик истеъмоли оқибатида заҳарланган. Шифохонага мурожаат қилганларнинг 26 нафари хорижликлардир. Уларнинг 11 нафари ҳаётдан кўз юмган.
Қалбаки спиртли ичимликлар оқибатида вафот этган Ўзбекистон фуқаролари сони 6 нафарга етди: улардан 5 нафари эркак, 1 нафари аёл киши.
Қайд этилишича, полиция воқеа юзасидан кенг қамровли тергов ишларини бошлади. Мазкур ҳолатга алоқадорликда айбланиб, 2 нафар Туркманистон фуқароси қўлга олинган ва уларга нисбатан жиноят иши очилган.
Шу муносабат билан, Истанбул шаҳридаги Бош консулхона барча фуқароларни спиртли ичимликлардан тийилишга ва эҳтиёткорликка чақирди.
Аввалроқ Самарқандда ароқдан заҳарланиш оқибатида 5 нафар эркак вафот этгани ҳақида хабар берилганди.
Андижон вилоятида 2024 йил декабрида 5 киши спиртли ичимликдан заҳарланиб вафот этганди. 22 киши Ўзбекистон акциз маркаси ёпиштирилган “Ўзбекистон” номли коняк истеъмол қилгани оқибатида шифохонага ўткир заҳарланиш ташхиси билан ётқизилган. Шифокорлар томонидан кўрсатилган зарур тиббий ёрдамга қарамасдан, уларнинг 5 нафари вафот этганди.
2023 йилнинг сентябрида Фарғона вилояти Қўштепа ва Олтиариқ туманларида 7 киши ароқдан заҳарланганди. Наманганда эса 2020 йил охирларида 12 киши ароқдан заҳарланиб, уларнинг икки нафари вафот этганди.
Изоҳ (0)