Тошкент шаҳрида “Аския” бозори ҳудудида автотураргоҳга эга замонавий “Экобозор” савдо ва хизмат кўрсатиш мажмуасини қуриш бўйича инвестиция лойиҳаси бўйича тендер савдоларида Хитой компанияси ғолиб бўлди. Бу ҳақда E-auksion платформасида келтирилган.
Унга кўра, аукцион атиги 15 дақиқа давом этган ва биргина таклиф киритилгандан сўнг якунланган. Уни Sheng-Ke International компанияси амалга ошириб, бошланғич нархдан 5 фоиз юқори — 225,59 миллиард сўм таклиф қилган.
Ғолиб компания ҳақида
ЯИДXP маълумотларига кўра, компания 2024 йил май ойида рўйхатдан ўтган, устав капитали 68 миллиард сўмни ташкил қилади. У махсус қурилиш ишлари билан шуғулланади. Компания асосчиси ТОО Sheng-Ke International, раҳбари Чен Майқуан.
17 декабрь куни Янги Тошкент шаҳрини барпо этиш дирексияси мутасаддилари ва Sheng-Ke International компаниясининг вакиллари ўртасида учрашув бўлиб ўтган. Ушбу учрашувда томонлар янги шаҳар қурилиши бўйича лойиҳаларни муҳокама қилган ва имкониятлар юзасидан фикр алмашган. Янги Тошкент шаҳрининг келажакдаги ривожланишида ушбу компаниянинг ҳиссаси алоҳида ўрин тутиши қайд этилган.
“Аския” бозори реконструкцияси
Тошкентнинг Яккасарой туманидаги “Аския” деҳқон бозори тўлиқ реконструкция қилиниши ҳақида 18 ноябрь куни туман ҳокимлиги томонидан ўтказилган учрашувда маълум қилинганди. Туман раҳбари Нилуфар Аллабергенова бугунги кунда харидорларнинг келиб-кетишига бир қатор ноқулайликлар борлиги, бозорда жойлашган автотураргоҳ ҳажми кичиклиги, бозор очиқ ҳудудда жойлашгани боис ноқулай об-ҳавода фуқаролар қийналаётгани, тадбиркор ва аҳолига қулайликлар етарли эмаслигини айтганди.
Янги савдо мажмуаси 3 минг квадрат метрдан иборат экобозор, музлаткичли омборхона, шунингдек, эскалаторлар, пандуслар, Wi-Fi нуқталари, велосипед йўлаклари ва кўнгилочар объектларни ўз ичига олиши кутилмоқда. Бундан ташқари, яқин атрофда 4 юлдузли меҳмонхона қуриш режалаштирилган.
Лойиҳа доирасида 150 миллион доллар тўғридан-тўғри хорижий инвестициялар жалб этилиши, мингдан ортиқ янги иш ўринлари яратилиши кутилмоқда.
Бундан аввал Тошкент шаҳрининг Юнусобод туманидаги деҳқон озиқ-овқат бозори тўлиқ қайта қурилиши, беш баробар кенгайиб, бир нечта ҳудудлардан иборат замонавий савдо, бизнес ва дам олиш марказига айланиши маълум қилинганди. Қурилиш даврида бозор ўз фаолиятини тўхтатмайди, барча тадбиркорлар ишини давом эттиради. Уларга ишлаш учун имконият яратиб берилади.
Изоҳ (0)