Ferrari русумига мансуб камёб машиналар доим қимматга баҳоланган. Айниқса, бундай суперкарлар Жолидек машҳур шахсларга тегишли бўлса, унинг нархи сезиларли даражада ошади.
Америкалик актриса Анжелина Жоли ўзининг 1958 йилда ишлаб чиқарилган Ferrari 250 GТ машинасини ноябрь ойида кимошди савдосига қўяди, деб хабар бермоқда “Auto.mail.ru”.
Мазкур автомобиль Ferrari компанияси томонидан ишлаб чиқарилган 353 та нусхадан ўн биринчи рақамли машинасидир. Автомобиль 3 литрли Colombo V12 двигателига эга ва беш босқичли механик узатма қутиси билан жиҳозланган. Машинанинг ташқи кўриниши ажойиб қора рангда ишланган, ички қисми эса ёрқин қизил чарм мато билан қопланган. Унинг одометрига кўра, Ferrari атиги 10 минг километр йўл босиб ўтган.
250 GТ русумли суперкар биринчи марта 1958 йилда Париж автосалонида намойиш этилган. Christie’s аукцион уйининг маълумот беришича, машина Боррани брендидан оригинал ғилдираклари ва алюминий барабан тормозлари билан жиҳозланган.
Christie’s вакили автомобилда ўзининг асл двигатели ўрнатилганини тасдиқлади, лекин катта эҳтимол билан машина 1978 йилда кўк ва оқ рангга бўялган, ички қисми қорадан қизил рангга алмаштирилган. Кимошди савдолар уйи актрисанинг машинага қанча вақтдан бери эгалик қилгани ёки ундан умуман фойдалангани ҳақида маълумот беришдан бош тортди.
Шунингдек, Жоли нима учун машинани сотаётгани ҳам номаълум. Юлдуз бу Ferrari’ни ҳайдаган ҳолда деярли суратга тушмаган. Тахминларга кўра, актриса шунчаки керакциз нарсалардан халос бўлмоқда.
Одатда, бундай ноёб машиналар тахминан 0,5 миллион долларга сотилади. Christie’s аукционлар уйи эса машинани 660 000 дан 880 000 долларгача баҳоламоқда.
Изоҳ (0)