Ўтган сутка давомида Хитой Халқ озодлик армиясининг 57 та самолёти ва тўртта кемаси Тайванга туташ ҳудудга кириб келди. Бу ҳақда Тайван Мудофаа вазирлиги баёнотига таяниб «РБК» хабар берди.
«8 январь куни эрталаб соат 6:00 дан 9 январь куни эрталабки соат 6:00 га қадар Тайван атрофида Хитой Халқ озодлик армиясининг 57 та самолёти ва тўртта кемаси қайд этилди», — дейилади хабарда.
Тайван ҳаво ҳужумидан мудофаа тизимларининг идентификация зонасига 28 та самолёт, жумладан учта БЗК-005 дронлари, олтита Ж-11 қирувчиси, иккита Су-30, 12 та Ж-16 қирувчиси ва иккита Ж-10, иккита Ҳ-6 стратегик бомбардимончи самолётлари, шунингдек, КЖ-500 радиолокацион эрта огоҳлантириш ва бошқариш самолёти кирган.
Уларни кузатиш учун ҳаво ва денгиз патруллари юборилди. Бундан ташқари, ҳарбийлар ерга асосланган ракета тизимларини жойлаштирди, деб қўшимча қилади Тайван Мудофаа вазирлиги.
1949 йилда Хитой республикаси маъмурияти ва ҳукмрон Гоминдан партияси вакиллари фуқаролар урушида мағлубиятга учраганидан сўнг Тайванга эвакуация қилинган. Улар ХХРдаги янги коммунистик ҳукуматни қонуний деб тан олмади. Пекин эса Тайван суверенитетини тан олмади. Хитой ҳукумати оролни мамлакат провинцияларидан бири деб билади.
АҚШ Тайванга мудофаа ёрдами кўрсатиб, оролга қурол-яроғ етказиб беради. Президент Жо Байден, агар Хитой Тайванга қарши куч ишлатишга қарор қилса, Вашингтон ҳарбий жавоб беришга тайёрлигини таъкидлаган. Шу билан бирга, АҚШ «ягона Хитой» сиёсатига амал қилишда давом этмоқда, деганди у. Хитой ҳукумати, ўз навбатида, Тайванни куч билан ўзига қўшиб олишни истисно қилмаган.
Изоҳ (0)