Тайваннинг ҳаво мудофаа зонасига Хитой армиясининг 39 та жанговар самолёти кирди. Бу ҳақда Reuters хабар берди.
22 декабрь куни орол давлатнинг ҳаво мудофаа зонасига 21 та қирувчи, тўртта Ҳ-6 бомбардимончи, битта ёнилғи қуйиш ва сувости кемаларига қарши самолёт ва дронлари кирган. Авиатехниканинг катта қисми қирғоқнинг жануби-шарқий қисмидаги Баши каналини кесиб ўтган. Шунингдек, орол яқинида Хитой флотининг учта ҳарбий кемаси қайд этилган.
Тайван ҳаво мудофаа тизимлари Хитой самолётларининг ҳаракатини кузатган. Тайван қирувчи самолётлари ҳавога кўтарилган. Орол давлатининг бундай ҳаракати стандарт процедура ҳисобланади, чунки ҳаво мудофаасини тан олиш зонасига кириш мунтазам равишда амалга ошириб келинмоқда.
Сўнгги икки йил ичида Хитой тобора кўпроқ Тайваннинг ҳаво зонасига кирмоқда. Бу ҳолат 2021 йил куз-қиш ойларида кескин ошган. Хитой расмийлари оролни куч билан қайтаришга тайёр эканини очиқ айтмоқда.
Хитой етакчиси Си Цзиньпин ноябрь ойида бўлиб ўтган G20 саммитида АҚШ президенти Жо Байден билан учрашганди. Си Цзиньпин Тайван масаласини Хитой—АҚШ муносабатларидаги асосий қизил чизиқ деб атаганди. Декабрь ойида АҚШ Тайванга ҳарбий ёрдам учун 10 млрд доллар ажратишга тайёрлиги маълум қилинган. Шу билан бирга, АҚШ Тайванга янада такомиллаштирилган Patriot ракеталарини етказиб беришни таклиф қилган.
Изоҳ (0)