“Дарё” кундалигида 31 январда содир бўлган энг муҳим воқеалар 

“Дарё” нашри 31 январда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.

АҚШ—Хитой уруши муқаррар эмас, аммо ҳарбий можародан истисно қилинмайди

АҚШнинг истеъфодаги генерали Жек Кин Қўшма Штатларда Хитой билан уруш олиб бориш учун етарлича тайёргарлик йўқлигини айтди. Унинг сўзларини Newsweek нашри келтиради.

“Ҳақиқат ва диққат қилишимиз керак бўлган нарса шундаки, биз (Хитой билан урушга) етарлича тайёр эмасмиз. Минтақада самарали ҳарбий тийиб турувчи кучларимиз йўқ. Хитойнинг кемалари, самолётлари ва ракеталари АҚШникидан кўп”, — дейди у.

Жек Кин Конгресс Тайванга ХХРдан ҳужум бўлган тақдирда оролни ҳимоя қилиши кераклигини таъкидлади. “Вашингтон 19 миллиард долларлик ускуналарни ҳалигача жўнатгани йўқ”, — деди истеъфодаги генерал.

Бундан ташқари, у АҚШ—Хитой урушини муқаррар деб ҳисобламаслигини айтди. Унинг фикрича, бу яқин келажакда содир бўлмайди, аммо ҳарбий можаро юз бериши истисно эмас.

Эслатиб ўтамиз, аввалроқ АҚШ армияси икки йилдан кейин Хитой билан уруш бошланиши мумкинлиги ҳақида огоҳлантирилганди. Ҳарбий ҳаво кучлари генерали Майк Минихан бу ҳақда қўл остидаги офицерларга хабар юборган.

Кореялараро кескинлик вазияти қандай ечим топади?

АҚШ Жанубий Кореяни ҳимоя қилиш учун оддий ва ядровий қуроллардан фойдаланиш тарафдори, деди Пентагон раҳбари Ллойд Остин. У Сеулда Жанубий Корея миллий мудофаа вазири Ли Чжон Соп билан бўлиб ўтган матбуот анжуманида ушбу мавзуни кўтарди.

“Қўшма Штатлар кенг қамровли тийиб туриш мажбуриятига қатъий содиқ, бу АҚШ ҳарбий салоҳиятини, жумладан, оддий ва ядровий қуроллар, шунингдек, ракеталарга қарши мудофаадан тўлиқ фойдаланиш кабиларни ўз ичига олади”, — деди жаноб Остин.

Айни вазиятда АҚШ ва Жанубий Корея КХДР минтақадаги вазиятни беқарорлаштирмоқда, деган фикрда.

Эслатиб ўтамиз Корея ярим оролидаги вазият 2022 йил декабрда Шимолий Кореянинг дронлари Жанубий Корея ҳаво ҳудудига бостириб кирганидан кейин яна кескинлашди. КХДР қуроллари 2017 йилдан бери биринчи марта Кореялараро чегарани кесиб ўтди. Маълумотларга кўра Жанубий Корея КХДР билан бирлашишнинг янги режасини ишлаб чиқмоқчи.

Сайловлардан норози намойишчилар ва собиқ президентнинг АҚШга сафари

Бразилия собиқ президенти Жаир Болсонару тарафдорлари 8 январь куни Бразилия пойтахтида 2022 йилги президентлик сайловлари натижаларини қайта кўриб чиқишни талаб қилиб, намойиш уюштирганди.

Сўнгги маълумотларга кўра, собиқ президент АҚШнинг олти ойлик турист визасини олиш учун ариза топширди. Бу унинг адвокати Фелипе Александр маълум қилди.

Адвокатнинг аниқлик киритишича, Вашингтон Болсонарунинг аризасини 27 январь, жума куни қабул қилган, ариза кўриб чиқилаётган вақтда собиқ президент АҚШда бўлиб турибди.

Эслатиб ўтамиз 2022 йилги сайловда Бразилиянинг амалдаги президенти Лула да Сильва 50,8 фоиз, Болсонару эса 49,2 фоиз овоз олган. 

8 январь куни намойишчилар маъмурий бинолар, жумладан, Олий суд, президент қароргоҳи ва Миллий Конгресс биносига бостириб кирди. Шаҳарда фавқулодда ҳолат эълон қилинди, 1,5 мингдан ортиқ одам ҳибсга олинган.

Болсонару намойишчиларни қоралаган бўлса-да, Бразилия суди уни тартибсизликларни тергов қилишда айбланувчилар рўйхатига киритди. Прокуратура маълумотларига кўра, собиқ президент “жамиятни жиноятга ундаш ҳаракатини содир этган”.

Нукус воқеалари бўйича суд ҳукми эълон қилинди

31 январь куни Бухоро вилояти судида 1−2 июль кунлари Нукус воқеаларида айбланаётган 22 нафар судланувчига нисбатан жиноят ишини кўриб чиқиш якунлари бўйича суд ҳукми эълон қилинди. Бу ҳақда Олий суд матбуот хизмати хабар берди. 

Олий Суд журналист Лолагул Қаллиханова Жиноят кодексининг 59-моддасига кўра 8 йил озодликдан маҳрум қилиш жазосига, 62-моддага асосан дастлабки қамоқда ўтирган 6 ой 24 куни тайинланган жазодан чегирилиб, ўташ учун 7 йил-у 5 ой 6 кун озодликдан маҳрум қилиш жазоси қолдирилди ва жазо 3 йил синов муддати билан шартли деб белгиланиб, суд залида қамоқдан озод қилинди.

Нукусдаги тартибсизликлар етакчиси Даулетмурат Тажимуратов 16 йилга озодликдан маҳрум этилди. Унга жазонинг дастлабки 2 йилини қамоқда, қолган қисмини қаттиқ тартибли колонияда ўташ белгиланди.

Озодликдан маҳрум қилиш жазоси билан судланганларга нисбатан тайинланган жазо муддатлари" улар қамоққа олинган кундан бошлаб ҳисобланиб, жазони умумий тартибли колонияларда ўташ белгиланди.

Бундан ташқари, содир этилган жиноятлар оқибатида етказилган 6,8 миллиард сўмдан ортиқ зарарнинг 256 миллион сўми қоплангани инобатга олиниб, қопланмаган 6,5 миллиард сўмдан зиёд миқдордаги моддий зарарларни судланганлардан солидар тартибда ундириш, ўзлаштириш йўли билан талон-торож қилинган 228 миллион сўм зарарни судланган Даулетмурат Тажимуратовдан ундириш, судланганларга тегишли бўлиб жиноят иши доирасида хатловга олинган мол-мулкларни келтирилган зарарни қоплашга қаратиш белгиланди.