«Дарё» нашри 9 январда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Муҳокамаларга сабаб бўлган Эрон камикадзе дронлари энди Россиянинг ўзида ишлаб чиқариладими?
Россия ўз армияси томонидан Украинада фаол қўлланилаётган Эрон камикадзе-дронларини ишлаб чиқаришни бошламоқчи. Бу ҳақда Украина Миллий хавфсизлик ва мудофаа кенгаши котиби Алексей Данилов маълум қилди.
«Улар бу ишни амалга оширмоқчи бўлаётган шаҳарлардан бири — Толятти, бошқа шаҳарлар ҳам бор. Шу билан бирга, Россия зарур таркибий қисмлар танқислиги шароитида дронларини нимадан йиғиши катта савол бўлиб турибди», — дея қўшимча қилган котиб.
Россиянинг ўз ҳудудида Эрон дронларини ишлаб чиқишни йўлга қўйиш режалари ҳақида аввалроқ The Washington Post газетаси хабар берганди. Нашр маълумотларига кўра, Россия ва Эрон расмий шахслари ишлаб чиқариш бўйича 2022 йил ноябрида келишувга эришган.
2023 йил январида CNN телеканали Shahed-136 нинг 52 та деталидан 40 таси Американинг 13 хил компанияси томонидан тайёрланганини маълум қилганди. Қолган 12 та деталь Канада, Швейцария, Япония, Тайван ва Хитойда ишлаб чиқарилган.
Европа давлатларининг Россия-Украина можаросига нисбатан ўзгариб бораётган позициялари
АҚШ ҳукумати Украинага қурол-яроғларни улардан Россия ҳудудларига зарбалар беришда фойдаланмаслик шарти билан етказиб беришда давом этмоқда. Бу ҳақда америкалик шарҳловчи Андреас Клут Bloomberg учун ёзган мақоласида айтиб ўтди.
Шарҳловчининг фикрича, АҚШ Россияга зарбалар берилишига имконият яратиш орқали «қизил чизиқ»ни босиб ўтишни истамайди, чунки бу Россия ҳукуматини ядро қуролидан фойдаланишга гижгижлаши мумкин.
Германия Украинага ваъда қилган 40 та жанговар машинани армия захирасидан олиб бермоқчи. Айни жараёнда Франциянинг Россия-Украина можаросига позицияси ўзгармоқда. Дастлаб Франция президенти Москва ва шахсан Путин билан музокараларни давом эттиришнинг асосий тарафдорларидан бири эди.
Аммо сўнгги ҳафталарда Париж сиёсати ўзгариб кетди. Франция Украинага Ғарбда ишлаб чиқарилган танкларни етказиб берган биринчи мамлакатга айланди. Ҳозирда Германия Украинага ваъда қилган 40 та жанговар машинани армия захирасидан олиб бермоқчилигини билдирмоқда.
Тобора авж олаётган Хитой-Тайван можаросида «Украина модели» қўл келмайди
Агар Хитой 2026 йилда Тайванга бостириб кирса, бу ҳарбийлар орасида минглаб қурбонларга олиб келади, аммо Пекин ғалаба қозониши амри маҳол. Бу ҳақда ҳарбий низонинг катта кўламли симуляциясини амалга оширган Стратегик ва халқаро тадқиқотлар маркази (CSIС) ҳисоботида айтилади, деб ёзади CNN ҳужжат нусхасига таяниб. Ҳисобот «Кейинги урушнинг биринчи жангги» деб ном олди.
Экспертлар таъкидлашича, Тайванга ҳужум қилинган тақдирда, қурол-яроғ етказиб бериш бўйича «украин модели»ни амалга ошириш мумкин бўлмайди. «Уруш бошланганидан кейин Тайванга қўшинлар ёки ўқ-дориларни етказиш мумкин бўлмайди, шунинг учун вазият Украинадаги ҳолатдан тубдан фарқ қилади. Тайванликлар уруш олиб боришда нималардан фойдаланмоқчи бўлса, уруш бошланган вақтда улар қўл остида бўлиши керак», — деди лойиҳанинг уч раҳбаридан бири Марк Канчиан.
Шу билан бирга, марказ Хитой ва Тайван уруши «муқаррар ёки ҳатто эҳтимолий» эканини айтмаяпти. «Хитой ҳукумати Тайванга қарши дипломатик изоляция, босим ёки иқтисодий мажбурлаш стратегиясини қабул қилиши мумкин», — дея аниқлик киритилади ҳисоботда.
Эслатиб ўтамиз, Тайван кўрфазидаги вазият 2022 йил августида АҚШ Конгресси спикери Нэнси Пелоси Хитой ўз ҳудуди деб ҳисоблайдиган Тайванга ташриф буюрганидан кейин кескинлашган.Айни вазиятда, Тайван оролга бир суткада Хитойнинг 50 дан ортиқ самолёт ва кемалари яқинлашганини маълум қилди
Ўзбекистонда соғлиқни сақлаш ва фармацевтика соҳасига қандай ўзгартиришлар киритиш керак? Фожиага сабаб бўлган омиллар билан танишамиз
Ўзбекистонда «Док-1 Макс» препаратини қабул қилиш оқибатида болалар ҳаётдан кўз юмгани билан боғлиқ фожиа Ўзбекистон соғлиқни сақлаш ва фармацевтика соҳасида муаммоларни яққол кўрсатди. «Юксалиш» умуммиллий ҳаракати бундай ҳолатларнинг олдини олиш борасида бир неча таклифлар билан чиқди.
Биринчидан, дори воситаларини назоратсиз қўллаш амалиётини тўлиқ қайта кўриб чиқиш зарур, деб ҳисоблаймиз. Чунки биз қайси дорини ичиш бўйича кўпинча шифокор рецептисиз, дорихона сотувчилари билан маслаҳатлашамиз.
Маълум қилинишича, 2008—2018 йилларда Ўзбекистонда дори воситалари билан ўзини ўзи даволаш натижасида соғлиқнинг ёмонлашганлиги билан боғлиқ 2 300 та ҳолат рўйхатга олинган. ЖССТ маълумотларига кўра, дори воситаларини назоратсиз қўллаш ва ўзини ўзи даволаш даражасининг ошиши айнан реклама билан боғлиқдир.
Шунинг учун аввало, оммавий ахборот воситаларида дориларнинг бевосита рекламасига чекловлар жорий этиш ва дори воситаларининг рекламасига оид қонунчиликни бузганлик учун жавобгарликни кучайтириш таклиф қилинди.
Кейинги масала, дори воситаларини ишлаб чиқарувчилар, импорт қилувчилар ва сертификатлаш ташкилотлари масъулиятини кучайтириш. Хабар берилганидек, «Док-1 Макс» ва «Амбронол» дорилари, текширувларда аниқланишича, «Дори воситаларини стандартлаштириш илмий маркази» томонидан белгиланган тартибда лаборатория синовларидан ўтказилмаган. Натижада сифатсиз препаратларнинг сотувга чиқарилишига йўл қўйилган.
Шу мақсадда Жиноят кодексининг 186-3-моддаси субъектлари қаторига сифатсиз, қалбакилаштирилган ва хавфсизлик талабларига жавоб бермайдиган дори воситаларини тарқатишга йўл қўйган шахсларни ҳам киритиш таклиф этилмоқда.
Шунингдек, кенг аҳоли манфаатларига дахлдор бўлган фармацевтика саноатига оид ахборотларни етказувчи очиқ маълумотлар базасини шакллантириш, Сотиладиган барча турдаги дори-дармонларни мажбурий рақамли маркировкалаш жараёнини тезлаштириш таъкидланди. Харидорлар айнан маркировка орқали дорининг ҳақиқийлигини текшириши мумкин.
Изоҳ (0)