АҚШ Хитой билан юзага келиши мумкин бўлган конфликтга фаол тайёргарлик кўрмоқда. Бу ҳақда Wall Street Journal (WSJ) хабар берди.
Май ойида АҚШ ва Филиппин денгиз пиёда қўшинлари Тайван яқинидаги кичик оролларда ҳарбий машғулотлар ўтказди. Машғулотлар “Чинулк” вертолётларидан денгиз пиёда гуруҳларини жойлаштириш ва конфликт юзага келган тақдирда фойдаланилиши мумкин бўлган ерларни ўрганишни ўз ичига олади.
“Ўтган йили АҚШ қўшинлари Филиппиннинг бир нечта ҳарбий базаларидан фойдаланиш имконига эга бўлди ва машғулотлар уларнинг шимолида, Тайвандан бир соатча йўлдаги бир қатор оролларда бўлиб ўтди”, — дейилади хабарда.
Таъкидланишича, АҚШ денгиз пиёдаларининг вазифаси Тайванда уруш бошланган тақдирда, бошқа АҚШ қуролли кучлари ёрдамга келиши учун Хитойнинг ҳужумини секинлаштириш бўлади.
“Денгиз пиёдаларининг кичик, яширин гуруҳини фронтга жойлаштириш, уруш содир бўлган тақдирда, тактик асос вазифасини ўтайди”, — деди Стратегик ва халқаро тадқиқотлар марказининг катта илмий ходими Бенжамин Женсен.
Бироқ “бориш қийин, узоқ жойлардаги” машқлар кўплаб муаммоларни очиб берди. Баъзи оролларда учиш-қўниш йўлаклари мавжуд бўлса-да, бошқаларида фақат кичик вертолёт майдончалари бор. Чекка ҳудудларда эса ҳар доим ҳам радар тизимларини ҳаракатлантириш учун кенг йўллар мавжуд эмас.
Энг катта муаммо шундаки, ҳарбийларнинг денгиз қўшинлари ва уларнинг жиҳозларини ороллар орасида ташиш учун кичик кемалари йўқ.
“Бундай кемаларни ишлаб чиқариш режалари қолдирилган ва уларни қуриш ҳали бошланмаган”, — дейилади хабарда.
Ўз навбатида, вертолётлар камроқ юк ташиш имкониятига эга. WSJ’нинг қўшимча қилишича, Хитойнинг “ракета арсенали” ва “ҳар қандай шакл ва ўлчамдаги дронлари” ҳам хавотир уйғотади.
Изоҳ (0)