Uzbekistan Airways ва яна 14 компания IPO ўтказиладиган компаниялар рўйхатига киритилди

Президент Шавкат Мирзиёевнинг 13 апрелдаги «Капитал бозорини янада ривожлантириш чора-тадбирлари тўғрисида»ги фармони билан 2021—2023 йилларда акциялари фонд биржасида оммавий савдо учун жойлаштириладиган компаниялар рўйхати тасдиқланди, деб хабар беради Spot.

Рўйхатга 15 та йирик компания киритилди, бироқ тендер комиссияси билан келишилган ҳолда рўйхат яна ўзгариши мумкин:

• «Ўзметкомбинат»;
• «Ўзбекнефтгаз»;
• «Ўзмиллийбанк»;
• «Халқ банки»;
• «Агробанк»;
• «Микрокредитбанк»;
• «Қишлоқ қурилиш банк»;
• «Ўзагросуғурта»;
• «Қурилишмашлизинг»;
• «Ўзбекинвест»;
• Uzbekistan Airways;
• «Ўзтрансгаз»;
• Олмалиқ кон-металлургия комбинати;
• Навоий кон-металлургия комбинати;
• «Ўзавтосаноат».

IPO (Initial Public Offering) — акциядорлик жамиятининг акцияларини бирламчи ошкора таклиф этиш деган маънони билдиради. Яъни у жамият томонидан акцияларни чекланмаган шахслар орасидаги дастлабки сотуви, дастлабки таклиф қилинишидир. IPO’ни ўтказишдан асосий мақсад корхонани ривожлантириш учун кенг доирадаги инвесторлардан капитал жалб қилишдир.

Эслатиб ўтамиз, 2020 йилнинг октябрида Шавкат Мирзиёев давлат иштирокидаги корхоналарни жадал ислоҳ қилиш ва давлат активларини хусусийлаштириш тўғрисидаги фармонни имзолаган эди. Аввалроқ хусусийлаштириш режалаштирилган кўчмас мулклар рўйхати эълон қилинганди.