Ақтауда қулаб тушган самолётнинг омон қолган йўловчиси Субхонқул Раҳимов ҳалокатдан кейинги дастлабки сониялар ҳақида гапириб берди.
48 ёшли Субхонқулнинг сўзларига кўра, самолёт 2-3 марта Грозний ҳудудида қўнишга уринган, бироқ қуюқ туман туфайли қўна олмаган.
Кейин у ва бошқа йўловчилар портлаш овозини эшитган, бироқ нима портлагани ва қаерда бўлганини тушуна олмаган. Шундан сўнг самолёт бошқа йўналишда уча бошлаган.
“Учувчига раҳмат, у бизни манёврлари билан қутқарди. Агар у бўлмаганида, ҳаммамиз ўлган бўлардик”, деди Субхонқул.
Унинг айтишича, авария ҳолати туфайли самолётда кислород ниқоблари тушганда, уларда кислород деярли йўқ экани маълум бўлган. У орқа ўриндиққа ўтиб, бошқа ниқобни тақишга уринган. Бундан ташқари, унинг сўзларига кўра, қулашидан олдин самолёт бир муддат ҳавода айланган.
Субхонқулнинг жойи самолётнинг дум қисмида бўлган, унинг ёнида ўтирганларнинг барчаси тирик қолган.
Субхонқул ҳалокатда ўзининг тирик қолишини мўжиза деб атади. У жиддий жароҳат олмаган, фақат боши қаттиқ оғриётганини маълум қилган.
Қозоғистондаги авиаҳалокатга оид сўнгги маълумотлар
Бокудан Грознийга учаётган Embraer 190 йўловчи самолёти 25 декабрь куни Қозоғистоннинг Ақтау шаҳрида қулаб тушди. Самолёт Azerbaijan Airlines авиакомпаниясига тегишли бўлиб, бортида 69 киши, жумладан, 5 нафар экипаж аъзоси бўлган.
Сўнгги маълумотларга кўра, ҳалокатда 32 киши, жумладан, бир нафар экипаж аъзоси омон қолган. Уларга зарур тиббий ва руҳий ёрдам кўрсатилмоқда. 12 кишининг аҳволи оғир экани айтилган.
Қозоғистон президенти Қосим-Жўмарт Тўқаев самолёт ҳалокатини текшириш бўйича комиссия тузишни буюрган.
Озарбайжон президенти Илҳом Алиев авиафожиа муносабати билан Россиядаги МДҲ саммитига қатнашмай, Бокуга қайтган.
Ўзбекистон президенти Шавкат Мирзиёев самолёт ҳалокатга учрагани муносабати билан Озарбайжон ва Россия президентларига ҳамдардлик йўллади.
Изоҳ (0)