Чеченистон расмийлари “Бокудан Грознийга учиб кетаётган AZAL самолёти ҳалокатида қурбон бўллганлар ва жароҳатланганларнинг барча оилаларига Рамзан Қодировнинг кўрсатмаси бўйича моддий ва бошқа ёрдам кўрсатишга тайёрлигини” маълум қилган эди.
“Дай.Аз” сайти Озарбайжон президенти маъмуриятидаги манбаларига таяниб маълум қилинишича, мамлакат ҳеч қандай ёрдамга муҳтож эмас ва буни қабул қилмайди.
“Озарбайжон ҳеч қандай ёрдамга муҳтож эмас. Давлат ҳам, фуқаролар ҳам бундай ёрдамни қабул қилишмайди. Биз ўз фуқароларимизга керакли ёрдамни ҳамиша кўрсатганмиз ва бундан кейин ҳам кўрсатамиз. Озарбайжон фактни тан олишни, узр сўрашни ва тегишли товон тўлашни талаб қилмоқда”, деган президенти маъмуриятидаги манба.
25 декабрь куни AZAL компаниясига тегишли Embraer 190 йўловчи самолёти Боку—Грозний йўналиши бўйлаб учиб, Оқтов аэропортидан 3 километр узоқликда қулаган эди.
Самолёт бортида 67 киши (62 йўловчи ва 5 экипаж аъзоси) бўлган.
Улардан 38 нафари ҳалок бўлди, 29 нафари омон қолди. Экипажнинг иккала учувчиси ва стюардесса ҳалок бўлди.
Самолётнинг “қора қутиси” аллақачон аниқланган ва уни халқаро авиация конвенцияларига мувофиқ таҳлил қилиш бўйича ишлар олиб борилмоқда.
Изоҳ (0)