2 декабрь Халқаро қулликка барҳам бериш куни муносабати билан АҚШ Молия вазирлигининг Хорижий активларни назорат қилиш бошқармаси (OFAC) Урганч шаҳридаги давлат меҳрибонлик уйида одам савдоси ва гендер зўравонлик, жумладан, болаларга нисбатан жисмоний ва жинсий зўравонлик билан шуғулланган ўзбекистонлик уч собиқ давлат хизматчисига қарши санкция қўллайди.
Ҳар учала шахс ҳам Магницкийнинг Инсон ҳуқуқлари бўйича глобал қонунига асосланган ҳамда бутун дунё бўйлаб инсон ҳуқуқларини жиддий поймол қилган жиноятчиларга қаратилган АҚШ президентининг 13818-сонли Ижроия фармони (Э.О.) асосида санскиялар рўйхатига киритилди.
Шу билан бирга, бу шахсларга нисбатан Давлат департаменти томонидан йиллик Давлат департаменти, хорижий операциялар ва тегишли дастурларни ажратиш тўғрисидаги қонуннинг 7031(c) бўлимига мувофиқ виза чекловлари қўйилади. 7031(c) бўлим Давлат котиби чет эллик амалдорлар жиддий коррупцияга йўл қўйган ёки инсон ҳуқуқларини қўпол равишда бузганликлари тўғрисида ишончли маълумотга эга бўлган ҳолларда, мазкур шахслар ва уларнинг яқин оила аъзолари Қўшма Штатларга киритилмаслигини назарда тутади.
“Бугунги ҳаракатлар давлат хизматчилари гендер зўравонлик ҳамда одам савдоси тизимини сақлаш учун ўз куч ва мавқеидан фойдалангандаги ҳолатларнинг аянчли оқибатларини таъкидлайди. Қўшма Штатлар ҳимоя қилишга масъул бўлганларни эксплуатация қилишга интилаётганларни жавобгарликка тортишга содиқ қолади”, деди вазирлик вакили Бредли Т. Смит
Давлат меҳрибонлик уйида инсон ҳуқуқларининг жиддий бузилиши
Юлдуз Худайберганова, Анвар Курязов ва Ойбек Машариповлар давлат хизматчиси бўлган даврда бир неча бор жисмоний, жинсий зўравонлик ҳамда меҳрибонлик уйи тарбияланувчиларини “пуллаш” билан шуғулланган. Ўшанда Худайберганова меҳрибонлик уйи директори, Машарипов Хоразм вилояти адлия бошқармаси бошлиғи, Курязов туман фавқулодда вазиятлар бўлими бошлиғи лавозимларида ишлаган.
Худайберганова 10 ой давомида камида уч нафар вояга етмаган қизни пул ва моддий буюм эвазига камида олти хил эркак билан жинсий алоқа қилишга мажбурлаган. Худайберганова қизларнинг розилигига эришиш учун турли хил мажбурлаш усулларини қўллаган, жумладан, жисмоний калтаклаш, таҳдид қилиш, оч қолдириш ва тенгдошларидан ажратиб қўйиш. Машарипов ҳам, Курязов ҳам меҳрибонлик уйига берган “совға”лари учун компенсация сифатида етим болалар билан жинсий алоқада бўлишни талаб қилишган. Курязов ва Машарипов ёш қизларни ўлжа қилиш учун болалар уйига бир неча бор ташриф буюришган.
“Худайберганова, Курязов ва Машариповлар 13818-сонли фармонга асосан инсон ҳуқуқларининг жиддий бузилишида бевосита ёки билвосита иштирок этганлик учун санкциялар рўйхатига киритилди”, дейилади АҚШ Молия вазирлиги баёнотида.
Изоҳ (0)