Ўзбекистон қонунчилигида 2024 йил 1 декабрдан бир қатор ўзгариш ва янгиликлар кучга киради. Қуйида ушбу санадан кучга кирадиган асосий ўзгаришлар тақдим этилди.
Меҳнат мигрантлари учун касблар ва хорижий тилларга ўқитиш курслари ташкил этилади
Миграция агентлиги таълим ташкилотларига хорижда ишлашни истаган фуқароларни касбларга ва хорижий тилларга ўқитиш бўйича буюртмалар жойлаштиради.
Ичимлик суви учун тўловлар фақат электрон шаклда қабул қилинади
Соҳада шаффофликни таъминлаш ҳамда коррупцион ҳолатларга барҳам бериш мақсадида республика миқёсида ичимлик ва оқова сув хизматлари учун тўловларни фақат электрон шаклда қабул қилиш тизимига ўтилади.
Камбағал оилалар реестри шакллантирилади
“Маҳалла еттилиги” томонидан камбағал оилаларнинг ижтимоий шароити ва камбағалликка тушиш сабабларини ўрганиш натижасида Ижтимоий ҳимоя миллий агентлиги томонидан Камбағал оилалар реестри шакллантирилади.
Уй-жойни яхшилаш учун кредитга аризалар қабули бошланади
Уй-жой шароитини яхшилашга муҳтож бўлган шахсларга якка тартибдаги уй-жойни қуриш, реконструкция қилиш ва таъмирлаш мақсадлари учун 120 миллион сўмгача ипотека кредити ажратишга аризалар қабули бошланади.
Ижтимоий тўловлар – “Ижтимоий карта” орқали
Янги тайинланадиган ижтимоий тўловлар, хизматлар ва имтиёзлар, шу жумладан, протез-ортопедик буюмлар ва реабилитация техник воситаларини харид қилиш “Ижтимоий карта” ахборот тизимидан фойдаланган ҳолда ижтимоий карта орқали амалга оширилади.
Авторақамлар учун тўлов қилиш осонлаштирилади
Эндиликда автомототранспорт воситаларини давлат рўйхатидан ўтказиш ва уларга рақамлар бериш бўйича мурожаат қилиш ва тўловни амалга ошириш ЙҲХХ мобил иловаси, расмий веб-сайти, Call-маркази ёки ЯИДXП орқали амалга оширилиши мумкин.
Ҳимоя ордерини бериш ҳолатлари кенгайтирилади
Бир календарь йил давомида икки ва ундан ортиқ марта тазйиқ ва зўравонлик ҳолати бўйича мурожаат қилинганда ички ишлар органлари томонидан ҳимоя ордери ташаббус тартибида берилади.
Мажбурий ижро бюроси “Мажбуриятлар реестри”ни юритади
Суд ҳужжатлари ва бошқа органлар ҳужжатларининг сўзсиз ижросини таъминловчи “Мажбуриятлар реестри” институти жорий этилади.
Бунда:
- қарздор мол-мулки йўқлиги сабабли ундирув амалга ошириш имконияти бўлмаганда, у ҳақидаги маълумотлар мажбурий тартибда реестрга киритилади;
- қарздор ҳақида маълумот реестрга киритилгандан кейин унга нисбатан ижро иши доирасида қўлланилган барча чекловлар сақлаб қолинади;
- реестрга киритилган қарздорнинг мол-мулки ва пул маблағлари аниқланганда мажбурий ижро ҳаракатлари давом эттирилади.
Мева-сабзавот маҳсулотлари етиштирувчиларни баҳолаш тизими жорий этилади
Фермер ва деҳқон хўжаликларининг нуфузини ошириш, қайта ишловчи ва экспорт қилувчи корхоналарга кўмаклашишга қаратилган “мева-сабзавот маҳсулотлари етиштирувчиларни баҳолаш” тизими жорий этилади.
Изоҳ (0)