Ўзбекистон элчихонаси ташаббуси билан Корея халқаро соғлиқни сақлаш жамғармаси (KOFIH) президенти Ил Су Ха билан ҳамкорлик алоқаларини ўрнатиш бўйича музокаралар ўтказилди. Бу ҳақда “Дунё” АА мухбири хабар берди.
Маълум қилинишича, учрашув давомида Ўзбекистоннинг ижтимоий йўналишда олиб бораётган сиёсати, жумладан жамиятнинг ижтимоий ҳимоясини таъминлаш, аҳолининг турмуш даражасини яхшилаш, ижтимоий хизматлар кўрсатиш ҳамда ногиронлар учун махсус марказларни яратиш бўйича фаолияти тўғрисида батафсил маълумот берилди.
Шу билан бирга, Ўзбекистон президенти ҳузуридаги Ижтимоий ҳимоя миллий агентлиги ва Корея халқаро соғлиқни сақлаш жамғармаси ўртасида ўзаро ҳамкорлик ҳужжати лойиҳасини шакллантириш юзасидан аниқ келишувларга эришилди.
Тадбир давомида Ўзбекистонда кексалар ва ногиронларни қўллаб-қувватлаш учун кундузги марказларни ташкил этиш, Жанубий Корея модели асосида оилавий зўравонлик қурбонларига тез ёрдам кўрсатиш марказлари моделини жорий этиш ҳамда ижтимоий ҳимоя ва тиббий ёрдам хизматларини интеграцияси жараёнини такомиллаштиришга кўмаклашиш бўйича фикр алмашилди.
Бундан ташқари, ҳозирги кунда Тошкент тиббиёт академиясининг ўқув салоҳиятини ошириш ҳамда Самарқандда сил касаллигини аниқлаш ва даволашни кучайтириш каби лойиҳаларини ўз вақтида ва самарали амалга оширишга алоҳида эътибор қаратилди.
Изоҳ (0)