Германия президенти Франк-Валтер Штайнмаер 20-Бундестагни расман тарқатиб юборди ва навбатдан ташқари сайловларни 23 февралга белгилади.
Қарор ҳукмрон коалиция парчалангани ва канцлер Олаф Шольцнинг парламент ишончини қозонишга бўлган муваффақиятсиз уринишидан сўнг қабул қилинган.
“Қийин пайтларда мамлакатга лаёқатли ҳукумат ва барқарор кўпчилик керак”, деб тушунтирди Штайнмаер.
Президент ўз мурожаатида партияларни ҳалол ва шаффоф сайлов кампаниясини ўтказишга чақирди, шу билан бирга, Tesla асосчиси Илон Маскни қаттиқ танқид қилди. Штайнмаер америкалик бизнесменнинг “Германия учун муқобил” партиясини қўллаб-қувватлашига ишора қилиб, мамлакат сиёсатига очиқ аралашувини қоралади.
“Қарор фақат сайлов ҳуқуқига эга бўлган барча Германия фуқаролари томонидан қабул қилинади. Бу сайлов кампаниясида нафрат ва зўравонликка ўрин йўқ”, дейди у.
Президент бўлажак ҳукумат олдида иқтисодий инқироз, миграцияни бошқариш, иқлим ўзгариши ва халқаро можаролар каби муҳим вазифалар турганини таъкидлади.
“Муаммоларни ҳал қилишни яна сиёсатнинг асосий вазифасига айлантириш вақти келди. Айни пайтда одамлар айнан шуни кутмоқда”, дея қўшимча қилди сиёсатчи.
Штайнмаер, шунингдек, бўлажак сайловлар долзарб вазифаларни бажаришга тайёр бўлган кучли ҳукуматни шакллантириш имконини беришига умид билдирди.
Изоҳ (0)