Лондон марказида номаълум эркак машинасини тунги клубга кираверишда тўпланиб турган одамлар устига ҳайдади. Бу ҳақида шаҳар полицияси матбуот хизмати хабар берди.
Тўрт нафар жабрланувчи шифохонага етказилган, улардан бирининг аҳволи оғир. Ҳайдовчи 31 ёшли эркак қотилликка уринишда гумонланиб ҳибсга олинган. Полиция ҳодисанинг терроризмга алоқаси йўқлигини қайд этди.
Ҳодиса бугун, 25 декабрга ўтар кечаси Шафтесбери авенюсида содир бўлган. Машина қарама-қарши бўлакда ҳаракатланаётган бўлган, Шундан сўнг у кутилмаганда пиёдалар йўлагидаги одамлар устига буриб юборган.
Полициянинг тахминича, қўлга олинган эркак мазкур ҳаракатни содир этишдан олдин тунги клубда рўй берган жанжалда қатнашган. Департамент ҳодиса бўйича текширув бошланганини маълум қилди.
Магдебургдаги теракт
20 декабрь куни тунда Германиянинг Магдебург шаҳридаги Рождество ярмаркасида қора рангли BMW автомобили катта тезликда одамлар тўпланиб турган жойга бостириб кирди.
Билд нашри тарқатган маълумотларга кўра, воқеа оқибатида 11 киши ҳалок бўлган. Турли даражада жароҳат олганлар сони 205 нафарга етгани айтилмоқда.
Мазкур терактни содир этган шахс 50 ёшли асли саудиялик Толиб ал Абдулмуҳсин бўлиб, у 2006 йилда Германияга ўқиш учун келган.
Ўзининг ватани Саудия Арабистонида у терроризм, одам савдоси билан боғлиқ айбловлар билан қидирилмоқда. Германия ўз вақтида Абдулмуҳсинни саудияликларга экстрадиция қилишдан бош тортган.
Хитойда автотеррорист ўлим жазосига ҳукм қилинди
Хитой суди Чангде шаҳрида машинасини одамлар устига бостириб ҳайдаган шахсни ўлим жазосига ҳукм қилди.
2024 йилнинг 19 ноябрь куни Хуан Вен исмли шахс Чангде шаҳрининг Дингченг туманидаги бошланғич мактабга кираверишда тўпланиб турган одамлар устига машинасида бориб урилган эди. Ҳодиса оқибатида 18 нафар мактаб ўқувчиси жароҳатланган.
Изоҳ (0)