Тошкент—Самарқанд йўналишида йўналишида ҳаракатланувчи поездлар учун янги темирйўл магистралининг техник-иқтисодий асосларини тайёрлашга старт берилди. Бу ҳақда “Ўзбекистон темир йўллари” матбуот хизмати хабар берди.
Маълум қилинишича, 2024 йил 24 декабрь куни “Ўзбекистон темир йўллари” АЖ раҳбарияти Саман Corporation лойиҳа менежери Жин Канга (Жанубий Корея) билан музокаралар ўтказди. Тошкент—Самарқанд янги юқори тезликдаги йўловчи темирйўлини қуриш бўйича дастлабки техник-иқтисодий асослаш бўйича ишларнинг бошланиши муҳокаманинг асосий мавзуси бўлди.
Шавкат Мирзиёев 2024 йилнинг сентябрида бўлиб ўтган Осиё инфратузилмавий инвестициялар банки йиғилишида Тошкент—Самарқанд ва Самарқанд—Навоий—Бухоро йўналишларида тезюрар поездлар учун янги темирйўл қурилишини маълум қилганди. У 2030 йилгача 30 млрд долларлик давлат-хусусий шериклик лойиҳалари дастури доирасида амалга оширилади.
“Ўзбекистон темир йўллари” хабарида таъкидланишича, президент ташаббуси билан амалга оширилаётган мазкур лойиҳа Ўзбекистон транспорт тизимини модернизация қилишга қаратилган. Янги магистрал икки йирик шаҳар ўртасидаги қатнов вақтини сезиларли даражада қисқартиради, йўловчиларга қулайлик даражасини оширади ва транспорт хизматлари сифатини оширади.
Томонлар ушбу ташаббуснинг минтақалараро алоқаларни яхшилаш, йўловчилар оқимини кўпайтириш ва тезюрар поездлар қатновини кўпайтиришда муҳимлигини қайд этган.
“Лойиҳанинг амалга оширилиши республиканинг иқтисодий ривожланишини мустаҳкамлашга ёрдам беради ва Ўзбекистон транспорт саноатини янги босқичга олиб чиқади”, дейилади хабарда.
Музокаралар натижасида лойиҳанинг техник-иқтисодий асосларини тайёрлаш жараёнини тезлаштирадиган ишчи гуруҳ тузишга қарор қилинди.
Ёнҳаб агентлиги берган маълумотга кўра, Тошкент ва Самарқанд ўртасидаги янги тезюрар темирйўл қурилиши лойиҳаси Жанубий Корея Эксимбанкининг Иқтисодий ҳамкорлик жамғармаси (EDCF) ҳисобидан молиялаштирилади.
Техник-иқтисодий асослаш ишлари 15 ой, яъни 2026 йилнинг март ойигача давом этади. Korail, шунингдек, Saman ва Dongmeong Technology Corporation компанияларидан иборат K-Rail жамоаси жараённи олиб боради.
Транспорт вазирлиги матбуот хизматининг хабар қилишича, мазкур тезюрар темирйўлни қуришда иштирок этишга Туркиянинг Rönesans ҳолдинг компанияси қизиқиш билдирган. Ушбу компания Туркиядаги энг йирик қурилиш ва инвестиция компанияларидан бири бўлиб, Голландия, Швэтсария, Германия ва бошқа бир қатор мамлакатларда ўз филиалларига эга.
Изоҳ (0)