Исроил ҳарбийлари Ғазо секторидаги ҲАМАС ҳаракати томонидан фойдаланилган туннелларни сувга бўктириш имкониятини кўриб чиқмоқда. Шу мақсадда улар насос тизимини ўрнатди, унинг қуввати ерости йўлакларига сув бостириш ва улардан ҲАМАС жангчиларини ҳайдаб чиқариш имконини беради, деб ёзди The Wall Street Journal (WSJ) 4 ноябрь куни АҚШ ҳукумати исми ошкор этилмаган амалдорларига таяниб.
Ноябрь ойи ўрталарида Исроил мудофаа кучлари Аш-Шати қочқинлар лагеридан бир ярим километр шимолда камида бешта насос ўрнатиш ишларини якунлаган. Газетанинг ёзишича, соатига минглаб кубометр сув билан ерости тармоғи бир неча ҳафта ичида бутунлай сув остида қолиши мумкин. Исроил насослардан барча гаровга олинганлар қўйиб юборилишидан олдин фойдаланмоқчими ёки кейин, хабарда айтилмаган
Туннел тизими ҳарбий мақсадларда ишлатилади
Reuters хабарига кўра, Исроил армияси вакили туннелларга сув бостириш режаси тафсилотларини изоҳлашдан бош тортган, бироқ шундай деган:
“Исроил мудофаа кучлари турли йўллар, турли ҳарбий ва технологик воситалар ёрдамида ҲАМАСнинг террорчилик имкониятларини йўқ қилишга уринмоқда”.
ҲАМАС узоқ йиллардан бери ҳарбий мақсадларда кенг кўламли ерости йўлакларидан фойдаланиб келади. Исроил армияси даъво қилишича мамлакатга ҳужум пайтида ҲАМАС айнан ушбу туннеллар ёрдамида Исроил ҳудудига кирган. Исроил армияси ноябрь ойида Ғазо секторидаги “Аш-Шифо” касалхонаси остидаги туннелни ҳам топди.
Изоҳ (0)