Шанхайга 16 сентябрь куни сўнгги 75 йилдаги энг кучли “Бебинка” тайфуни ёпирилди. Бу ҳақда Хитой марказий метеорология бошқармаси хабар берди.
Маълум қилинишича, “Бебинка” Шанхайга маҳаллий вақт билан соат 07:30 да етиб келган. Шамолнинг максимал тезлиги секундига 42 метрга етган.
“Бебинка” “Глория” тайфунидан ўтиб кетди ва 1949 йилдан бери Шанхайга етиб келган энг кучли тайфунга айланди, дея таъкидлади хитойлик метеорологлар.
Тахминларга кўра, Шанхайдан ўтгач, тайфун ғарбий шимоли-ғарбга соатига тахминан 25 километр тезликда ҳаракатланади. “Бебинка”нинг кучи аста-секин пасайиб, 17 сентябрга ўтар кечаси Анхой ва Хенан провинциялари чегарасида тропик депрессия даражасигача сусаяди. Расмийлар аҳолига ўта зарурат бўлмаса, хавфсиз бошпаналарни тарк этмасликни тавсия қилмоқда.
Аввалроқ Марказий ва Шарқий Европани ларзага солган “Борис” бўрони оқибатида камида олти кишининг ҳалок бўлгани маълум қилинганди. Руминияда сув тошқини қурбонлари тўрт кишини ташкил этган. Табиий офат туфайли беш мингдан ортиқ уй-жой зарар кўрган. Дарёларда сув сатҳи кўтарилиб, минглаб уйлар сув остида қолган. Польша ва Чехияда сув тошқинлари туфайли Украинага бир қатор поездлар ҳаракати тўхтаган, Чехия ва Польшада тўғон ёрилган.
Изоҳ (0)