АҚШнинг сайланган президенти Дональд Трамп New York Post газетасига берган интервьюсида Украина етакчиси Владимир Зеленский ўт очишни тўхтатишни ҳамда сулҳ тузишни хоҳлашини айтди.
“Зеленский сулҳ тузмоқчи. У ўт очишни тўхтатишни истайди. Биз тафсилотларни муҳокама қилмадик. У вақт келди деб ўйлаяпти”, деди Трамп Зеленский билан Парижда учрашганида.
Аввалроқ Трамп Зеленский ва Украина “келишувга эришмоқчи” эканини айтиб, зудлик билан ўт очишни тўхтатиш ва музокаралар ўтказишга чақирган эди.
Россия президенти матбуот котиби Дмитрий Песков Москва Трамп баёнотини кўриб чиққанини маълум қилган. У Путин тинчлик музокараларини ўтказиш шартларини айтганини, бироқ Украина ҳамон мулоқотдан бош тортаётганини таъкидлаган.
Песковнинг сўзларига кўра, Зеленскийга музокараларни тақиқлаш ҳақидаги фармонни бекор қилиш ва “юзага келган воқеликни ҳисобга олган ҳолда Истанбул келишувлари асосида” мулоқотни қайта бошлаш бўйича кўрсатма бериш кифоя қилади.
WSJ нашри аввалроқ Украина президенти офиси раҳбари Андрей Ермак Трамп жамоаси вакиллари — миллий хавфсизлик бўйича маслаҳатчи лавозимига номзод Майк Валс ҳамда Россия ва Украина бўйича махсус элчи лавозимига даъвогар Кейт Келлог билан учрашгани ҳақида хабар берган эди. Нашр маълумотларига кўра, мунозараларга сайланган вице-президент Ж.Д.Венс ҳам қўшилган. Бундан олдин нашр Ермак Флоридада Трамп бошқарувида Оқ уй аппаратини бошқариши керак бўлган Сюзи Уайлс билан учрашганини қайд этган эди.
Изоҳ (0)