Қашқадарё вилояти Қамаши туманидаги «Файз» деҳқон бозорида 2 январь куни савдогарлар мутасаддиларга қаршилик қилиб, жанжал чиқаргани хабар қилинганди. Вилоят Ички ишлар бошқармаси ҳолат юзасидан қўшимча маълумот берди.
Қайд этилишича, шу куни бозорда тахминан соат 10:30 ларда Қамаши туман ҳокимининг ўринбосари ва шу бозор раҳбари томонидан бозор ҳудудида ободонлаштириш ишларини олиб бориш ҳамда бозор атрофига бетон ариқ ўрнатиш мақсадида туман ҳокимияти ободонлаштириш бўлимига қарашли экскаватор машинасини ишлатаётган вақтда бозор ҳудудида савдо ишлари билан шуғулланувчи бир нечта фуқаролар вазиятни нотўғри талқин қилиб, ободонлаштириш бўлими ходимлари ва ҳокимият вакилларини фаолиятига тўсқинлик қилиб, жанжал уюштириб, жамоат тартибини бузган.
Бозор ҳудудига жамоат тартибини тиклаш учун жалб қилинган Қамаши туман ички ишлар бўлими ходимлари томонидан 6 нафар ҳуқуқбузарлик содир этган фуқароларнинг ҳаракатлари расмийлаштирилган. Тўпланган ҳужжатлар асосида Жиноят ишлари бўйича Қамаши туман суди томонидан Маъмурий жавобгарлик тўғрисидаги кодекснинг 183 (майда безорилик) ва 194 (ички ишлар органлари ходимининг қонуний талабларини бажармаслик), 195-моддалари (ички ишлар органлари ходимларининг ўз хизмат бурчларини бажаришларига қаршилик кўрсатиш)га асосан икки нафар фуқарога базавий ҳисоблаш миқдорининг бир баравари миқдорида жарима, тўрт нафарига 15 сутка маъмурий қамоқ жазоси тайинланган.
Жамоат тартибини бузишда иштирок этган яна тўрт нафар фуқарога нисбатан Қамаши туман ИИБ ҳузуридаги ТБ томонидан Жиноят кодексининг 277-моддаси (безорилик) 3-қисми «г» банди билан жиноят иши қўзғатилиб, тергов ҳаркатлари олиб борилмоқда.
Изоҳ (0)