Ижтимоий тармоқларда “Фарғона шаҳар савдо мажмуаси”да тадбиркорлар ва бозор маъмурияти ўртасида жанжал содир бўлгани ҳақида видеолавҳалар тарқалди. Ушбу ҳолат Фарғона вилояти бўйича Миллий гвардия бошқармаси томонидан ўрганиб чиқилди.
Ҳолат 24 июль куни соат 13:30 ларда содир бўлган. Келишмовчиликка асосий сабаб — бозор маъмурияти билан тадбиркор ўртасида тузилган шартномага кўра, тадбиркорлар ўзига белгилаб берилган ҳудуд ва дўконларда савдо қилиши кўрсатиб ўтилган. Бироқ кўплаб тадбиркорлар бозор ички йўлакларигача товарларини чиқариб сотиш ҳолатлари аниқланган.
“Бозор маъмурияти фавқулодда келиб чиқиши мумкин бўлган ҳолатлар олдини олиб тушунтириш ишларини бошлаганда тадбиркорлар ўртасида ўзаро тушунмовчилик юзага келган.
Мазкур ҳолат юзасидан ҳеч ким ҳеч қандай тан жароҳати олмаган. Мазкур вазиятнинг ҳар бир ҳолати бўйича белгиланган тартибда маъмурий ишлар олиб борилмоқда”, дейилади хабарда.
Қўшимча қилинишича, айни дамда Миллий гвардия ходимлари бозор ҳудудида белгиланган тартибга кўра хизмат фаолиятини олиб бормоқда. Шу билан бирга, савдогарларга ҳуқуқий тушунтириш ишлари олиб борилди.
Изоҳ (0)