Швециялик экология фаоли Грета Тунберг Европа бўйлаб қилган саёҳатидан кейин коронавирус билан боғлиқ вазият сабаб икки ҳафта ўз-ўзини изоляция қилгани ҳақида гапириб берди. У бу ҳақда ўзининг Instagram’даги саҳифасида пост ёзган.
Гретанинг сўзларига кўра, у онаси ва синглисидан узоқда, ўзи ижарага олган квартирасида карантинда ўтирибди.
«Тахминан ўн кун аввал коронавируснинг янги аломатларини сеза бошладим, мен билан Брюсселда бирга саёҳат қилган отамда ҳам касаллик белгилари намоён бўлган», — дея ёзган Тунберг.
У чарчоқ ҳис этгани, титроқ, томоқ оғриғи кузатилгани, шунингдек, йўтал кузатилганини қайд этган. Экология фаоли отасида ҳам шунга ўхшаш касаллик белгилари кузатилгани, ҳатто кучлироқ таъсирлар бўлганини ҳам таъкидлаган, яъни иситма ҳам кўтарилганини билдирган.
Тунбергнинг айтишича, Швецияда тиббиёт ёрдамига муҳтож фуқароларнинг коронавирусга қон таҳлили топширишининг имкони йўқ ва ҳукумат ўзини ёмон ҳис этаётган барча фуқароларга уйда ўтириш, ўз-ўзини ижтимоий изоляция қилишни тавсия қилмоқда.
«Шу сабабли мен COVID-19 га таҳлил топширмадим, лекин катта эҳтимол билан менда касаллик белгиларига ўхшаш аломатлар кузатилган», — дейди Тунберг.
БМТ минбаридан туриб дунё давлатларининг раҳбарларини танқид қилган Грета коронавирус инфекциясининг белгилари ёшларда заифроқ кечиши, баъзан узоқ вақт яширин даврда бўлишини таъкидлаган. Табиат ҳимоячиси ёшларнинг вирус хавфини сезмасдан бошқаларга ҳам коронавирус юқтириши мумкинлигини айтиб ўтди.
Мавзуга доир:
Изоҳ (0)