Хитойнинг ичимликлар ишлаб чиқарувчи Nongfu Spring компанияси президенти Чжун Шаньшань мамлакатнинг энг бой одамига айланди

Хитойнинг қадоқланган сув ишлаб чиқарувчи энг йирик компанияси Nongfu Spring’нинг эгаси Чжун Шаньшань мамлакатнинг энг бой одамига айланди. Унинг компанияси акциялари биржа савдоларига қўйилгач, нархлар кескин ошган. Бу ҳақда «Интерфакс» хабар берди.

Bloomberg маълумотларига кўра, Nongfu Spring компаниясининг президенти ҳисобланган Чжун Шаньшаннинг бойлиги 58,7 миллиард долларни ташкил қилади. У мазкур кўрсаткич бўйича Alibaba компанияси асосчиси Жек Мани ортда қолдирди. Жек Манинг бойлиги 56,7 миллиард долларга баҳоланмоқда.

Шу тариқа, Чжун Шаньшань дунёнинг энг бой одамлари рўйхатида 17-ўринни эгаллади ва тахминан 10 миллиард доллар фарқ билан Google асосчиси Ларри Пейждан кейинги қаторда турибди.

Financial Times газетасининг ёзишича, Чжун Шаньшаннинг бойлиги Nongfu Spring компанияси акциялари сентябрь ойида биринчи марта Гонконгда биржа савдоларига қўйилгач ошди. Компания акциялари биржа савдолари бошланганидан кейин 80 фоизга қимматлашган. Компания акцияларининг 80 фоизи Чжун Шаньшанга тегишли.

Бундан ташқари, тадбиркор гепатитга қарши вакцина ва COVID-19’ни аниқлаш бўйича тест ишлаб чиқарувчи Wantai Biological Pharmacy Enterprise Co., компаниясини ҳам назорат қилади. Бу компаниянинг акциялари нархи эса 2020 йил апрель ойида Шанхай биржасидаги савдоларга қўйилгач, 14 бараварга қимматлаган.

Таҳлилчиларнинг қайд этишича, хитойлик бизнесменлар даврасида «якка бўри» номи билан танилган тадбиркор бойлигининг тез ўсиши инвесторларнинг Хитой истеъмол секторига бўлган қизиқиши билан боғлиқ. Бу қизиқиш мамлакат иқтисодиёти ўсишининг муҳим омили ҳисобланади.

Nongfu Spring компанияси акциялари қийматининг унинг кутилаётган даромадларига мувофиқлиги 70 фоизга тенг. Cоcо-Cоlа компаниясида эса бу кўрсаткич 30 фоизни ташкил қилади.

Иқтисодчиларнинг фикрича, Nongfu Spring компаниясининг коронавирус пандемияси сабабли 2020 йилнинг биринчи ярим йиллигида кескин пасайган савдолари тикланмаса, унинг акциялари нархи тушиб кетиши мумкин.

Аввалроқ 2019 йилда Хитойда АҚШдагига нисбатан деярли уч баравар кўп янги миллиардерлар пайдо бўлгани ҳақида хабар берилганди. Alibaba асосчиси Жек Ма 2020 йилнинг март ойида Bloomberg талқинига кўра, Осиёнинг энг бой одами деб топилганди. Унинг ушбу мақомни қўлга киритишига жаҳон бозорида нефть нархининг пасайиши ва аввалги энг бой миллиардер ҳиндистонлик Мукеш Амбанининг 5,8 миллиард доллар йўқотгани сабаб бўлганди.