Бразилия президенти Жаир Болсонару Time журнали томонидан ўқувчилар орасида ўтказилган сўровномада 24 фоиз овоз билан биринчи ўринни эгаллади. 2021 йилда дунёга энг катта таъсир кўрсатган шахс ёки одамлар гуруҳини аниқлаш бўйича онлайн овоз беришда жами 9 миллиондан ортиқ обуначи иштирок этган.
«2022 йилда президентликка қайта сайланишни ният қилган баҳсли раҳбарнинг иқтисодий чора-тадбирлари норозиликка дучор бўлмоқда, шунингдек, у COVID-19 ни у қадар жиддий қабул қилмагани ва вакциналарга шубҳа билан қарагани учун сиёсатчилар, судлар ва соғлиқни сақлаш экспертларининг кенг кўламли танқидига учрамоқда», — дея Болсонаруга таъриф берган Time таҳририяти.
АҚШнинг собиқ президенти Дональд Трамп Time онлайн сўровида 9 фоиз овоз билан иккинчи ўринни эгаллади. Учинчи ўриндан тиббиёт мутахассислари (6,3 фоиз овоз), тўртинчи ўриндан эса «россиялик ҳуқуқшунос ва коррупцияга қарши курашувчи» деб аталган Алексей Навальний (6 фоиз) жой олган.
Коронавирусга қарши вакциналар ишлаб чиқувчи олимлар 5,3 фоиз овоз билан рейтингни якунлаган.
Time онлайн сўровномаси натижалари одатда таҳририят танлови билан бир хил бўлмайди. 2020 йилда Time ўқувчилари ҳаётий муҳим аҳамиятга эга хизматларни кўрсатувчи ходимларни энг юқори баҳолаган, таҳририят эса ўша пайтда сайланган АҚШ президенти Жо Байден ва вице-президент Камала Харрисни маъқуллаган.
Бу йил журнал таҳририяти йил одами бўйича ўз танловини 13 декабрь куни эълон қилмоқчи.
Аввалроқ Forbes дунёнинг энг нуфузли аёллари рейтингини эълон қилганди. 2011 йилдан бери рўйхатда биринчи бўлган Меркель ўз ўрнини Жефф Безоснинг собиқ рафиқаси, ёзувчи Маккензи Скоттга бўшатиб берди. Меркель Германия канцлери лавозимини тарк этгач, журнал уни рўйхатдан чиқарган.
Изоҳ (0)